Kuyalwe abafana eMkhosini kaBhacela
IMEYA yaseNdwedwe, uMnuz Nkosinathi Chili, iphonsele abafana inselelo yokuba bazi besebancane ukuthi umuntu wesifazane uyahlonishwa futhi uyavikelwa. IMeya ibikhuluma eMkhosini kaBhacela obusezinkundleni zemidlalo KwaDulela eMalangeni, eNdwedwe ngoLwesithathu.
“Umkhosi obizwa ngoMkhosi kaBhacela owokukhulisa abafana ukuze baqonde ukuthi kuyini ukuba ngumuntu wesilisa nokuthi yiziphi izinselelo abhekene nazo.”
UChili uthe isikhathi esiningi kuhlale kugqugquzelwa abantu besifazane ukuba bakhuthalele ukuhlola ubuntombi futhi baqhubeke nokuziphatha kahle.
“Nomuntu wesilisa ukuze akhule kahle kufanele azi ukuthi okokuqala kufanele ahloniphe umuntu wesifazane, azi ukuthi uyahlonishwa futhi uyavikelwa.” IMeya ibuye yakhuthaza abafana ukuthi bazihloniphe noma yikuphi lapho beya khona ukuze babe nombono wokuthi indoda iyinhloko yekhaya futhi ayidlwenguli izingane ezincane.
Inkosi yaseMalangeni, uThulasizwe Ngcobo, ithe uBhacela kwakuyinkosi eyabumba isizwe sakwaNgcobo.
“Sekuwunyaka wesibili senza lo mkhosi ngenhloso yokuqhakambisa iqhaza alibamba esizweni nasekukhuliseni abafana,” kusho inkosi.
USomlomo waseNdwedwe, uMnuz Khonza Ngidi, uthe kuyamjabulisa ukubona umkhosi udlondlobala njengoba kulo nyaka abantu bebengangoZulu eya eMakheni.
Umphakathi waku-ward 16 (obandakanya indawo yaseMalangeni, eyakwaWosiyane neyakwaNgoza) bewuphume ngobuningi bawo uzozibonela ngawawo kukhuliswa abafana.
Abafana babuye bayosokwa ngabezempilo ebebenkanise kule ndawo.
Ngaphambi kokuqala kwalo mcimbi kubonakale inkosi noSomlomo behola amabutho abevunule econsa kusukwa esibayeni sakomkhulu.
Phakathi kwezicukuthwane ebezihambele umkhosi kubalwa nePhini leMeya yaseNdwedwe uNkk Ester Blose, uNdlunkulu wenkosi yaseMalangeni uMabe uMaKhuzwayo, amakhansela namakhosi ezinye izizwe. Kuthe usuya emaphethelweni lo mkhosi kwacula abaculi bakamaskandi abasafufusa abebesina bededelana abanjengoNomfundo Xulu noPhunyukabemphethe beqembu lendlamu laseMnamane.