UBilliat ukhonjwa kwanemali phesheya
KUKHONA nezinkunzi zase-United State of America (USA), i-LA Galaxy emaqenjini agaqele umdlali weMamelodi Sundowns uKhama Billiat.
Isolezwe lihabule lezi zindaba ngomthombo walo osondelene noBilliat ukuthi iGalaxy isike yaxhumana nemenenja yalo mdlali. IGalaxy isike yadlalelwa nguDavid Beckham owayedume ngokungayibheki i-free kick kwiManchester United nakwiEngland. Inkontileka kaBilliat neSundowns iyaphela ngoJuni.
“Maningi amaqembu abuza ngesimo sikaBilliat. Emaqenjini amfunayo kukhona ne-LA Galaxy yase-USA. Uma kuphela isizini yena uzophelela phesheya kwezilwandle, ngeke aye kwelinye iqembu lalapha eNingizimu Afrika. Okwamanje kubukeka sengathi uzophelela kwiQarabag ekade idlalelwa nguDino Ndlovu. “Leli qembu sekunesikhathi limfuna uBilliat. Izingxoxo zihamba kahle nemenenja yakhe. IGalaxy ike yafona kanye ibuza ngesimo sakhe kodwa ngemuva kwalokho ayiphindanga yaxhumana nemenenja. Yingakho ngithi kubukeka sengathi uzoya kwiQarabag,” kusho umthombo othembekile. IQarabag yiqembu elikhulu lase-Azerbaijan. Lisanda kudayisa isibabuli sayo somgadli uNdlovu osedlala kwiZhejiang Greentown eyibamba esigabeni sesibili kwiligi yaseChina.
UBilliat sekunesikhathi agcina ukubonakala kwiSundowns. Usalimele njengoba engadlali. KwiSundowns ufike ngo-2013 esuka kwi-Ajax Cape Town. Kuleli qembu usezinqobe zonke izicoco ezimqoka.
Usehlabane ngesicoco seCAF Champions League, CAF Super Cup, izicoco ezimbii ze-Absa Premiership, Nedbank Cup neTelkom Knockout.
Ngo-2016 ubekhona ngesikhathi iSundowns igijima kwiFifa Club World Cup eJapan. Ngonyaka odlule uBilliat ubeyingxenye yeqembu lesizwe laseZimbabwe ebelibambe iqhaza kwi-Africa Cup of Nations (Afcon) eGabon.
Kuthintwa imenenja yakhe uMike Ngobeni we-M-SportsManagement ngendaba kaBilliat ukhale ngokuthi akakwazi ukuphawula ngekusasa lomdlali ekubeni esenenkontileka neSundowns.