Bazofihlwa ngoLwesine kwaMngomezulu
AZOFIHLWA ngoLwesine amalungu omndeni wakwaMngomezulu amane ashone ngoLwesithathu olwedlule ngesikhathi izulu lilelesa umuzi wakhona.
Lokhu kushiwo nguMnuz Mzikayifani Mngomezulu, umfowabo omncane womninimuzi, naye obekade kuthiwa ushonile.
“Abashonile yinkosikazi yomfowethu, uNelisiwe obezithwele, uSceluxolo (7), Olwethu (11) no-Asimbonge (3). Umfowethu wafika sekonakele kodwa uyaphila. Mina ngathola ukushokheka (emzimbeni) ngaphuthunyiswa esibhedlela. Akekho oyindoda oshonile, siyaphila nomfowethu,” kucacisa uMngomezulu.
Uthe amalungiselelo omngcwabo ayaqhubeka. Bahlela ukuthi izidumbu zibe sekhaya ngoLwesithathu bese umngcwabo uba ngoLwesine.
“Sifuna kufike iPhasika sesibafihlile ngoba nomfowethu ukhona futhi usashaqekile ngokwenzekile. Sonke siphatheke kabi kodwa sesamukele ngoba ngeke sikushintshe okwenzekile,” kusho uMngomezulu.
UMnuz Msawakhe Mayisela, obhekelele ezokuxhumana eMnyangweni wezokuBusa ngokuBambisana nezoMdabu KwaZulu-Natal, uthe ngaphandle kokushona kwamalungu omndeni wakwaMngomezulu azikho ezinye izigameko ezibikiwe zokushona kwabantu.
“Sithole ukuthi eMnambithi naseNewcastle kunezindawo ezihlaselwe yizikhukhula kwadilika imizi yodaka kodwa akekho oshonile. Esikwenzile wukuqinisekisa ukuthi amathimba ezinhlekelele ami ngomumo ukuze kuphephe abantu,” kusho Mayisela.
Uthe uNgqongqoshe wezokuBusa ngokuBambisana nezoMdabu KwaZulu-Natal, uNkk Nomusa Dube-Ncube, ucela abantu baqaphe nakuleli sonto ngenxa yokuthi kunesixwayiso samathuba emvula ewu-80%.
“UNgqongqoshe ucela abantu baqaphele ngoba nakuleli sonto izazi zezulu zixwayise ngokuthi amathuba emvula awu-80%. Uyacela ukuthi abantu bangaweli emabhulohweni asuke esegcwele amanzi futhi balalele amathimba ethu ezinhlekelele uma ebaxwayisa,” kusho uMayisela.
Uthe yize izulu lina ngamandla kodwa amadamu awakagcwali okusho ukuthi abantu abaqhubeke nokonga amanzi.