IVodacom Super Rugby iwumqansa
KUVALWE ngehlahla emaqenjini aseNingiZimu Afrika amele iNingizimu Afrika kuVodacom Super Rugby akhale ngaphansi wonke ngaphandle kweDH Stormers enqobe ngo 25-19 kuQueensland Reds ngoMgqibelo eKapa.
Bese kuyiwini yesithathu kumaStormers kodwa kwiCell C Sharks neVodacom Bulls kusinda kwehlela emuva kokuba ephinde athola isibhaxu. Indaba iqalwe yiSharks ngoLwesihlanu enenebulwe yiMelbourne Rebels ngo 46-14 e-AMMI Park, e-Australia.
Ukushaywa kweSharks kuphinde kwakhumbuza abalandeli bayo ngobunzima ebhekene nabo kwazise iqale kabi kule sizini. Emidlalweni emihlanu iSharks isanqobe kanye. Elinye iqembu elingazange liqale kahle yiBulls.
Ishaywe yiCrusaders ngo 33-14. Okubi ngeBulls iyiqala kahle imidlalo kuthembisa impela kodwa kuthi uma sekuphakathi noma uma umdlalo usuyophela ivele iqale yenze okuxakile.
Elinye iqembu elikhale ngaphansi yi-Emirates Airlines Lions. Iyiqembu elithwelwe ngeqoma ukuthi lizoqhubeka nokuphakamisa igama lezwe njengakumasizini amabili adlule. Nokho iJaguares iyinqobile ngo 49-35.
Ngesikhathi kuqala isizini iSharks ibithishwe ukuthi iqale kahle emuva kokuthenga kahle nokuqinisa nangoDick Muir onomlando omude wokudla izicoco neqembu nakumaBhokobhoko. Okubonakala ngeSharks kodwa wukuthi abadlali bayo basemuva abanakho ukuzethemba okulindelekile kubona. Abaphambili bayazama kodwa ngeke benze lutho uma abasemuva bengaphapheme ngokugcwele.
Ngempelasonto iSharks iyasuka e-Australia iwelela eNew Zealand. Ngeke kube lula nokho ngoba iqala e-Auckland ngomdlalo weBlues.
Isiyonke imiphumela yeSuper Rugby ihambe kanje:
Jaguares 49-35 Lions; Stormers 25-19 Reds; Hurricanes 29-12 Highlanders; Sunwolves 10-61 Chiefs; Rebels 46-14; Sharks; Crusaders 33-14 Bulls.