Usizi itekisi iphaphalaza ibulala abafundi
UMPHAKATHI waseMakhoso, eMthwalume, ubabaza ingozi enyantisa igazi okubhubhe kuyo abafundi abane belinde imoto kamalume esitobhini, izolo ekuseni.
Ababili abafundi ngabandawonye. Ingozi yenzeke esitobhini esisemgwaqweni omkhulu eMakhoso ngezithuba zehora lesikhombisa ekuseni.
Siye koshicilela izolo omunye umfundi, uPamela Khumalo (13) esesimeni esibucayi esibhedlela. Abafowabo ababili bakaPamela, uSbongakonke (13) no-Andile Khumalo (6) bangabanye babashonile.
Abanye abafundi abashonile, uZamadwala Shabane (13) noSilindokuhle Msani (13), bonke bakhelene. Kubikwa ukuthi kukhona nabantu abadala abalimele besesitobhini.
Omunye wabaphuthume endaweni yesigameko, uMnuz Bongani Ngwane uthe uyaqala ukubona ingozi enyantisa igazi njengaleya.
“Ngifike endaweni yesehlakalo ezinye zezingane sezithule. Angizange ngikholwe ukuthi zishonile bengicabanga ukuthi uma ngizithinta zizovuka,” kusho uNgwane.
Uthe bezwe kuthiwa itekisi ebulele abafundi ibizama ukusika iveni kanti kuzoqhamuka enye imoto ngaphambili.
“Le tekisi kuthiwa ibe seyibalekela eceleni komgwaqo yaphaphalaza yayoshayisa abafundi abebemile esitobhini belinde imoto yabo abaya ngayo esikoleni,” kusho uNgwane. Uthe bezwe kuthiwa itekisi ibigijima kakhulu yingakho iphaphalazile yashayisa abafundi.
“Indlela okwenzeka ngayo kuyabonakala ukuthi itekisi ibigijima ngoba ifike yabashayisa abafundi yabathwala ngesibuko sangaphambili yababhangqa nodonga lwenhlabathi,” kusho uNgwane.
Uthe bezwe kuthiwa umshayeli wetekisi ubalekile,” kusho uNgwane.
Ithimba leSolezwe lifike endaweni yesehlakalo kukhona newashi elincane okukholakala ukuthi ngelomunye wabafundi abalimele.
UNkk Ola Khumalo ongunina wezingane zakwaKhumalo okushone kuzo ezimbili enye esesimeni esibucayi esibhedlela uthe balindele noma yini ngendodakazi yakhe esesibhedlela njengoba ilimele kakhulu ekhanda.
Uthe uyise wezingane zakhe useKenya lapho esebenzela ngakhona okwamanje.
UMnuz Skho Shabane onguyise kaZamadwala izolo ubengakakwazi ukukhuluma ngokushona kwendodakazi yakhe.
IMeya kaMasipala waseMzumbe, uMnuz Sizwe Ngcobo ithe: “Okusiphatha kabi kakhulu wukuthi sekungokwesibili kwenzeka into efanayo uma kuzoba nePhasika. Kuyacaca ukuthi kukhona into engahambi kahle,” kusho uNgcobo.
Okhulumela amaphoyisa KwaZuluNatal uCaptain Nqobile Gwala uthe amaphoyisa avule icala lokubulala ngokungenhloso, bekungakaboshwa muntu.