Bakhala ngozungu abawaseGlebe
BAKHOLWA wukuthi baboshelwe uzungu abasolwa emacaleni okubulala abantu ehostela laseMlaza, eGlebelands.
Izolo, abasolwa abayisikhombisa, bavele eNkantolo yeMantshi eThekwini, abayisithupha kubo bafake izicelo zebheyili. Oyedwa wakuhoxisa ukufaka isicelo sebheyili.
U-Advocate Jimmy Howse we-Andile Dakela & Associates, izolo efunda imiqulu yabane abamele uthe bayawaphika wonke amacala futhi bakholwa wukuthi baboshelwe amanqina enyathi.
Abamelwe u-Advocate Howse, oMnuz Khayelihle Mbuthuma (28), Wonderboy Hlophe (45), Bhekukwazi Mdweshu (37) noNcomekile Ntshangase (34).
UMnuz Mbuyiselwa Mkhize (29) noVukani Mcobothi (30) bamelwe ummeli wesihle, kulindeleke kusasa, abafakele isicelo sebheyili.
UMnuz Mondli Mthethwa uyibongile ibheyili. Bonke laba kuvele ukuthi bahlala ehostela, abanye babehlala ehostela kodwa basuka ngenxa yezimo ezithize.
UMdweshu ongumphenyi eDurban Central, ecelelwa ibheyili kuvele ukuthi umisiwe emsebenzini futhi akaholi.
“Lo msolwa (uMdweshu) wake wabekwa icala lokubulala ngo-1996 kodwa lahoxiswa. Kusukela ngo-2008 waqashwa emaphoyiseni kuleli. Ubehlala ehostela kodwa wahamba wayohlala eNewlands emuva kwemizamo yokumbulala ehostela. Umsolwa akawazi lawa macala abhekene nawo futhi ukholelwa wukuthi uboshelwe uzungu ngawo ngoba abukho ubufakazi ngawo. Ukuboshwa kwakhe kuyamlimaza kakhulu ngoba umisiwe emsebenzini futhi ulahlekelwa umholo wakhe wonke,” kusho uHowse.
Nabanye abasolwa kube ngesifanayo, ummeli ebeka izimo zabo zempilo nokuthi amacala abawazi. Efunda izitatimende, uthe abasolwa abahlangene nakancane nokubulawa kwabantu njengoba nabo bebehlala kuleli hostela besondela emisebenzini, abanye kungamakhaya abo ehostela.
UNtshangase kuvele ukuthi usebenza kwaPrasa uhola uR18 000 ngenyanga, unonkosikazi onguthisha nomndeni wakhe ohlala e-Eastern Cape. Uthe akalazi icala, ukutoka kuzomlahlekisa ngomholo njengoba ondla umndeni, efundisa nomfowabo enyuvesi, enza nezinye izidingo
zakhe. UMbuthuma uthe selokhu aboshwa ngoDisemba ngamacala angawazi ukugqunywa kwakhe esitokisini kuzophazamisa ukuthi babonane nommeli wakhe. UHlophe ongunogada ohola imali ecela kuR5000, uzikhalele ngokuthi umndeni wakhe uzolamba ngokuboshwa kwakhe ngamacala angawazi. Uthe uhlale ehostela kusukela ngo-2003, yizimfamona ezifuna agqunywe ejele ukuze ajeze ngento angayazi. Icala lihlehliselwe uLwesithathu ukuze nabanye bezofaka ezabo izicelo. Ngokohlu lwamacala asencwadini esenkantolo, angu-18 esewonke. Phakathi kwawo ayisishiyagalolunye awokubulala, ayisikhombisa okuzama ukubulala, elokushintshisana ngemali ngokungemthetho, athinta isibhamu nezinye izinto ezenzeka eGlebelands.