Kunzima umndeni udilikelwa wumuzi
UMPINTSHENE kwamakhelwane umndeni wakwaMasondo KwaMashu umuzi wawo odilike ngesikhathi iloli ebithwele amablokisi iphaphalaza ingena kuwo.
Amalungu ayisishiyagalombili omndeni athe ampintshene ekamelweni elilodwa kwamakhelwane kusukela ngoMgqibelo okwenzeke ngawo ingozi.
UMnuz Nathi Masondo uthe batshelwe ukuthi umnikazi weloli unenkontileka nabakwaBuilt Rite, kwaBester, lapho amablokisi abekade ethengwe khona. Kodwa abaphathi bakwaBuilt Rite bathe ngoba iloli akulona elabo ngeke bazithwale izindlelo zokulungisa umuzi.
Umuzi, onamakamelo amane, udilike waphela kwalimala impahla ebiphakathi nemoto ebisegcekeni.
UMasondo uthe njengamanje umshayeli weloli ubatshele ukuthi unenkontileka nalesi sitolo esidayisa impahla yokwakha kodwa isitolo siyamphika.
“Kuthe uma isitolo sesithi uzimele, washintsha wathi imali akanayo. Abasesitolo basihlanganisa saxoxa kodwa akukho okubambekayo asitshela kona. Uke wathumela abantu abafike bazokala kodwa abasitsheli ukuthi yini ezolandela,” kusho yena.
UMqondisi esitolo, uMnuz Gani Mohsim, uthe uwutholile umbiko mayelana nengozi yeloli ebithwele amablokisi kodwa wathi iloli akulona elabo futhi belingaqashiwe yibo, beliqashwe yikhasimende.
“Akekho umsebenzi wethu obekhona elolini. Isitolo sethu sinawo amaloli aso kodwa akuphoqelekile ukuthi ikhasimende lidilivelwe yithi. Uma lifuna ukuqasha noma iyiphi imoto eliyithandayo liyakwenza lokho. Ngaphandle kwesitolo sethu kunenqwaba yamaveni namaloli abantu bendawo aqashwa ngamakhasimende ethu, asikwazi ukunqabela osomabhizinisi abancane abakhele indawo esisebenza kuyo ukuthi basebenze. Kuyishwa okwenzekile kodwa thina asikwazi ukubhekana nezindleko zokulungisa umuzi ngoba umshayeli uzimele,”
Uthe yize kungewona umthwalo wabo ukuthi bakhokhele umndeni olinyalelwe kodwa bazibophezele ukuwunikeza isaphulelo sikaR5000 empahleni yokwakha uma uyithenga esitolo sabo.
Umshayeli okuthiwa nguye umnikazi walo owaziwa ngoChili uthe: “Ngimatasatasa kabi namakhasimende anginaso isikhathi sokuphendula imibuzo. Abesitolo nomndeni othintekayo ngibatshelile ukuthi ngiyalulungisa