Kushone abathathu bedilikelwa wudonga
KUSHONE abasebenzi abathathu emuva kokudilika kodonga lwesakhiwo phakathi komgwaqo uManchester noChamberlaine eJacobs, eThekwini, izolo.
Abashonile kuthiwa bangabanye abebesebenza njengoba kwakhiwa. Okhulumela abezimo eziphuthumayo KwaZulu-Natal, uMnuz Robert McKenzie, uthe kuwe udonga ngo-1 emini lwacindezela abantu.
“Abezimo eziphuthumayo bazamile ukuhlenga abebembozekile. Kushone abathathu abanye baphuthunyiswa ezibhedlela. Ngokombiko esinawo bahlanu abayiswe ezibhedlela,” kusho uMcKenzie.
Isolezwe lithole ukuthi isakhiwo siyizitezi ezimbili. Ngesikhathi kudilika kuthiwa kuqhume nepayipi lamanzi kwaphazamiseka ukutakulwa kwabebembozekile.
Okhulumela amaphoyisa KwaZuluNatal, uCaptain Nqobile Gwala, uthe amaphoyisa aseBrighton Beach avule idokodo ngokushona kwabathathu.
“Kade kwakhiwa, kwawa udonga kwalimala abasebenzi.
“Kushone abathathu. Abanye bayiswe ezibhedlela. Imbangela ayikaziwa kodwa siyaphenya,” kusho uCaptain Gwala.
Okhulumela uMnyango wabaSebenzi KwaZulu-Natal, uMnuz Lungelo Mkamba uthe bajube ithimba elizobheka ukuthi ngabe kulandelwe yonke imibandela yokwakha njengoba kwenzeke le nhlekelele.
“Okwamanje akukacaci ukuthi laba basebenzi bebakha noma ngabanye abasebenza kulesi sakhiwo.
“Esikutholile nje wukuthi kudilikile kwabe sekushona abathathu. Ithimba lethu silithumele ukuze liphenye ngalesi sigameko,” kusho uMkamba.
Kule ndawo bekugcwele abantu abebebuka ngesikhathi abezimo eziphuthumayo betakula abebengaphansi kodonga oludilikile.
Omunye obepitshizwe wukhonkolo kuphoqe ukuba kusetshenziswe izindlawu ukuze kutakulwe isidumbu sakhe.