Isinqumo ngomasipala onezinkinga
UPHUCWE amandla izolo uMasipala iDkt Nkosazana Dlamini Zuma eCreighton nguNgqongqoshe woMnyango wezokuBusa ngokuBambisana neziNdaba zoMdabu KwaZulu-Natal uNkk Nomusa Dube-Ncube.
Umasipala oqanjwe ngoNgqongqoshe ehhovisi likaMengameli, uDkt Nkosazana Dlamini Zuma, uphucwe amandla wafakwa kumlawuli ngaphansi kwesigaba somthetho uSection 139 b.
UNkk Dube-Ncube uthe bayangenelela kulo masipala ngenhloso yokuqinisekisa ukuthi ulawulwa ngendlela.
“Inhloso yokuza lapha ukungenelela kulo masipala ngaphansi kwesigaba somthetho uSection 139 b. Inhlosongqangi yawo lo mthetho ukuqinisekisa ukusebenza ngendlela komasipala, lesi sinqumo sisisusela emizameni eminingi eyenziwe ngumnyango sizama ukutakula umkhandlu,” kusho uNkk DubeNcube. Uthe sekunesikhathi umasipala uhluleka nokugcwalisa izikhala ezibalulekile zezimenenja.
“Lokhu kuholele ekutheni umasipala ubhekane nezingqinamba ezidalwa nawukungaboni ngasolinye ngaphakathi.”
Uthe imihlangano emithathu yokugcina yalo mkhandlu ibe nomsindo, abanye bayiduba.
“NgoJanuwari 23 izikhulu zomnyango zeza emhlanganweni womkhandlu kodwa zangavunyelwa ukuthi zibe yingxenye yawo,” kusho uNkk Dube-Ncube.
Uthe lo mkhandlu uhlulekile futhi ukuqasha imenenja kamasipala noMqondisi.
USihlalo we-IFP kuzwelonke ophinde abe yilungu lesiShayamthetho KwaZulu-Natal, uMnuz Blessed Gwala, uthe bakhathazekile ngesezo sikaNkk Dube-Ncube sokuvikela imikhandlu eholwa nguKhongolose.