Kuboshwe ophonse usana ethoyilethi
KUBOSHWE owesifazane oneminyaka engu-24 osolwa ngokuthi uzibelethise usana maqede walujikijele ethoyilethi lomgodi ethi akalufuni.
Lo wesifazane waseSwapho, eMgungundlovu kuthiwa unenebulwe abanye besifazane ngezimvubu nangezinduku, bamqhuba eyokhomba lapho elahle khona usana wabe esebizelwa amphoyisa afike ambopha ngoLwesibili ebusuku.
Isolezwe linalo igama lalo wesifazane okuthiwa kubo kuseMatatiyela kodwa uhlala eMgungundlovu ngokomsebenzi. Kuthiwa unezingane ezimbili emakhaya okwenze wangafuna ukuba nenye ingane. Esinye isizathu sokulahla usana kuthiwa ubengamazi uyise.
Owesifazane (42) ongathandanga ukudalulwa, ingane ephoswe ethoyilethi lakwakhe utshele Isolezwe ukuthi namanje kusenzima ukukholwa akubonile.
“Ubulale ingane wayifaka ethoyilethe lakwami ngoba ethi akayifuni. Ngifike ngo6:30 kusihlwa ekhaya ngiphuma emsebenzini ngatshelwa omakhelwane ukuthi kayisabonakali ingane kulo wesifazane njengoba ekade ezithwele. Abesifazane basendaweni bahlanganile, bambuza ukuthi iphi ingane. Bamshayile wagcina ebakhombisile lapho eyifihle khona ngemuva kokuzibelethisa. Umzanyane ubewugqibe ngendwangu engadini. Ukhombe ethoyilethe lakwami wathi ingane uyifake khona. Liqaqiwe ithoyilethe kwathiwa akayithathe ingane. Ubuye nayo isishonile. Ngibone ukuthi sekungaphezu kwamandla ami ngafonela amaphoyisa,” kusho lo wesifazane.
Ingane kuvele ukuthi eyomfana.
Lo wesifazane utshele Isolezwe ukuthi bambuzile ukuthi kungani enze le nto.
“Usitshele ukuthi ubengayifuni ingane ngoba unezinye ezimbili futhi noyise wale ngane abeyithwele akamazi manje akafuni abantu bakubo baze bayibone.”
Lo wesifazane kuke kwavela ukuthi ubethi unezinyanga ezine ezithwele kodwa laba besifazane abazibonele ingane bathe besekuyingane ekulindeleke ukuba ibelethwe noma yinini.
Omunye umthombo weSolezwe ongathandanga ukudalulwa uthe sekuyinsakavukela kule ndawo ukuba kuboshwe abesifazane abasolwa ngokubulala izingane zabo noma ukukhipha izisu ngendlela engekho emthethweni.
“Cishe lo wesifane owesine ukuthinteka ecaleni lalolu hlobo kule ndawo. Ngiyaxakeka ukuthi basuke bekhulelwe kanjani uma bezophinde babulale izingane,” kusho lo mthombo.
Okhulumela amaphoyisa KwaZulu-Natal uCaptain Nqobile Gwala ukuqinisekisile ukuthi lo wesifazane uboshelwe icala lokufihla ukuthi ubelethile, wathi uzovela enkantolo yaseMgungundlovu maduze.