Isinqumo se-ANC kolweNational Wage Bill

I-ANC ifuna amalungu ePhalamende ahlangane yize kufanele athathe ikhefu ukuze axoxe ngodaba lweNational Minimum Wage Bill.

Lesi sinqumo sithathwe izolo yize amalungu amaqembu aphikisayo ethe afuna ukuphumula kodwa i-ANC ithe kufanele kuhlanganwe ngo-Ephreli 10 kuya ku-Ephreli 12.

UNgqongqoshe wezemiSebenzi, uNkk Mildred Oliphant, uthe abakwazi ukuphoqa abaqashi ukuthi basebenzise iNational Minimum Wage ngenxa yokuthi amalungu ePhalamende awakayidingidi kahle indaba yayo.

I-EFF neDA bacele ukunikezwa isikhathi esanele sokuthi benze iziphakamiso ngodaba lokushintshwa kwemithetho yezabasebenzi.

Bathe bafuna ukuphendula ngoEphreli 17.

UNkk Lerato Teko we-ANC uthe amalungu ekomiti labasebenzi kufanele anikele ngesikhathi sawo ngoEphreli 10 kuya ku-Ephreli 12 ngoba kulungiswa ikusasa labantu.

UMnuz Goerge Moteka we-EFF uthe akufanele kuphuthunywe uma kukhulunywa ngezindaba zokuthuthukiswa komnotho nezithinta abasebenzi.

UMnuz Michael Bagraim weDA uthe akaqondi ukuthi kungani benganikezwa isikhathi ukuze bayozwa ukuthi abantu bathini.

“Sikhona ngo-Ephreli 17 kungani kufanele sibuye ngo-Ephreli 10 kuya ku-Ephreli 12?” kubuza uBagraim.

Yize amaqembu aphikisayo ekhalile ngalesi siphakamiso kodwa kufanele aye ePhalamende ngenxa yokuthi i-ANC iwinile ngalesi siphakamiso.