Inkulisa yodado abanofuba
IZINGANE ezisencane ezinofuba olungazweli emishanguzweni ezilaliswa esibhedlela iKing Dinuzulu sezizophuma sezithole ithuba lokufunda enkulisa.
Lokhu kulandela ukuvulwa kwenkulisa esiza ngokuthi izingane zithole ithuba lokuphila njengezinye yize ziphethwe yisifo esiphoqa ukuthi zihlale izinyanga eziyisithupha esibhedlela.
UDkt Julia Ambler wenhlangano enakekela izingane ezinezifo eziphazamisa indlela ejwayelekile yokuphila neziphethwe yizifo ezingalapheki, i-Umduduzi Hospice Care for Children, uthe basungule inkulisa ukuze ukugula kungazincishi ithuba lokufunda.
“Kuqala izingane bezilala embhedeni usuku lonke zingalitholi ithuba lokwenza izinto ezenziwa yizingane ezingangazo. Manje sezizokwazi ukufunda, zidlale bese kuyima ziya kolala,” kusho uDkt Ambler.
Uthe lokhu kuzosiza ekutheni lezi zingane zibuyele emakhaya ziqhubeke nempilo njengokujwayelekile.
Izingane ezinofuba ezingaphansi kweminyaka engu-12 zilaliswa esibhedlela izinyanga eziyisithupha bese zidedelwa ziqhubeke nokuthatha imishanguzo zisemakhaya.
Isibhedlela sinesikole esifunda izingane ezifunda amabanga aphansi kusuka kuGrade 1 kuze kufike kuGrade 7, iKing George Primary lapho okufunda khona izingane ezinofuba ezisuke zilashwa ngenxa yokuthi kuthatha isikhathi eside ukulashwa kwazo.
Izingane ezisezingeni lokufunda enkulisa yizona ebezingafundi ngenxa yokuthi ibingekho indawo ebezingafunda kuyona.
Umphathi wesibhedlela, uDkt Rubin Naidu, uthe bakujabulele ukuthola ithuba lokusebenzisana nezinhlangano okubalwa kuzo Umduduzi Hospice Care for Children nezinye njengoba ethe bebengeke baphumelele ekusunguleni le nkulisa ngaphandle kokubambisana nayo.
Uthe inhloso yokusungulwa kwayo ukuqinisekisa ukuthi izingane ziphila impilo enenjabulo noma zigula.