Bazoyithola ngeSonto eyezibonelelo
UNGQONGQOSHE wezokuThuthukiswa koMphakathi uNksz Susan Shabangu uthe abahola izibonelelo zikahulumeni bazoyithola imali yabo ngeSonto.
Esitatimendeni esithunyelwe yiSouth African Social Security Agency (Sassa) sithe uNksz Shabangu uthi abantu abehlise amaphaphu ngoba imali yabo bazoyithola noma ngabe u-Ephreli 1 ungeholidi.
“Abantu abasebenzisa amakhadi asebhange, awakwaSassa bazokwazi ukuthola imali yabo kuma-ATM nasezitolo ngo-Ephreli 1. Abahola ezikhungweni bazoyithola ngo-Ephreli 3 imali yabo. Okubalulekile wukuthi ngeke kuphazamiseke ukuholelwa kwezibonelelo zikahulumeni,” kusho uNksz Shabangu.
Ekuqaleni kwesonto Isolezwe libike ukuthi inkontileka yeSassa neCash Paymaster Services (CPS) ilulwe ngezinyanga eziyisithupha ukuze abantu abangu-2.8 million abahola ukheshi ezikhungweni bakwazi ukuthola imali yabo.
NgoLwesihlanu iNkantolo yoMthethosisekelo ilule inkontileka yeCPS neSassa kanti inhlangano esiza umphakathi iBlack Sash ithe bekuphoqa ukuthi ilulwe le nkontileka ngoba ukube akwenziwanga lokhu abahola ukheshi bebengeke bayithole imali yabo.
IBlack Sash idonse ngendlebe abakwaSassa ukuthi bavikele abantu abahola ukheshi ukuze iCPS ingabathathisi imali ebolekisayo nokuthi ibadayisele eminye imikhiqizo.
UNkk Lynne Maart onguMqondisi weBlack Sash, uthe kufanele uNgqongqoshe wezokuThuthukiswa koMphakathi nabakwaSassa bathumele umbiko nyangazonke eNkantolo yoMthethosisekelo basho ukuthi bazoqinisekisa kanjani ukuthi abahola eyezibonelelo bayayithola imali uma sekuphele inkontileka ngo-Agasti.
“Siyajabula ukuthi iNkantolo yoMthethosisekelo ifuna kuvikelwe imininingwane yabantu abahola izibonelelo zikahulumeni. Asifuni ukuphinde sizwe kuthiwa abantu babanjelwa imali kwizibonelelo zabo,” kusho uNkk Maart.
Uthe bayajabula ukuthi owayenguNgqongqoshe wezokuThuthukiswa koMphakathi, uNksz Bathabile Dlamini nesikhulu esiphezulu sakwaSassa uNkk Pearl Bhengu kufanele babhale izitatimende ezifungelwe bachaze ukuthi kungani kungafanele bakhokhe izindleko zenkantolo.
“Sikule nkinga ngenxa kaNksz Dlamini nabakwaSassa abahluleka wukuhlela izinto zabo. Kufanele bakhokhe izindleko zenkantolo ngoba abantu kade bethukile bengazi noma bazohola yini ngo-Ephreli,” kusho uNkk Maart.