Umlando wegqom’ uvezwa namuhla
ABATHANDI begqom’ bazothola ithuba lokufunda kabanzi ngomsuka walo mculo kwiqophamlando (documentary) iGqom NationThe Documentary ezokhonjiswa kuMTV Base (DStv 322) namuhla ngo-9.30 ebusuku.
Leli qophamlando lizobe lishuthwa eThekwini nabaculi abasematheni kulezi zinsuku ngenxa yokuthandwa kwegqom’.
Phakathi kwabaculi nabadidiyeli abazobonakala bechaza ngalo mculo kubalwa iDistruction Boyz, DJ Sox, TDK Macassette, Dladla Mshunqisi, Rude Boyz nabanye.
“Abantu bazothola ngomlando wegqom’ ukuthi iqale kanjani. Abantu bayiqonde manje ukuthi wuhlobo lomculo olukade lwaba khona,” kusho uDJ Sox.
“Igqom’ yaqala ngesikhathi kudume ingoma eyayaziwa ngeBin Laden. Seyishintshile manje njengoba abantu sebeyibona. Uhlelo luzobabuyisela emuva baluqonde.”
Uthe okwenza igqom’ ibe sematheni manje wukuthi seyidlalwa emsakazweni futhi sekukhona nabantu abacula phezu kwezinsimbi.
“Ngemuva kweWololo (kaBabes Wodumo) iqalile yadlala kwithelevishini nasemsakazweni ngoba kuqala beyiphelela ezindaweni zobumnandi kuphela.”
Uthe kulabo abacabanga ukuthi lo umculo uwumlilo wamaphepha, kumele bakhohlwe. Uthe lo mculo uyikusasa futhi usematheni manje, okuyinto esazoqhubeka.
“Kade siyilanda emahontshi siyidlala. Ziningi kakhulu izintwana eziyenzayo mhlawumbe zingaphezulu kuka-400 eThekwini.
Azinendaba nokuthi abanye benzani kodwa zona zizenzela igqom’ zilinde ukuthi kuvele ithuba lazo. Uma uthi igqom’ izophela usholo ukuthi bonke laba bantu abashintshe isitayela nalabo abayithandayo, usho ukuthi kumele bafe?”
Uthe okuzokwenzeka wukuthi izoshintsha ihambisane nesikhathi.