Uchitha eyokungezwani noMotshekga
UNGQONGQOSHE wezeMfundo KwaZuluNatal usechithe imibiko yokuthi kunokubhekana ngeziqu zamehlo phakathi kwakhe noNgqongqoshe kazwelonke, uNkk Angie Motshekga.
UDlungwane uthe basebenzisana kahle noNkk Motshekga wathi kunabantu abafuna ukwakha isithombe sokuthi ababoni ngaso linye.
Usho lokhu nje izolo uNkk Motshekga ubehlangene neNatu njengoba le nyunyana ifuna umnyango wesifundazwe ufakwe ngaphansi kokulawulwa ngumnyango kazwelonke ngenxa yokuhluleka kwezikhulu zesifundazwe ukulungisa izinkinga zomnyango. “Sisebenzisana kahle noNgqongqoshe kazwelonke. Kungenzeka ukuthi kukhona abafuna ukudala uqhekeko phakathi kwethu. Angiyi kodwa emhlanganweni obizwe nguNgqongqoshe kazwelonke nenyunyana. Vele uhlale ehlangana nezinyunyana,” kusho uDlungwane. UDlungwane izolo ubehambele uSukuma Sakhe wesifundazwe eNdwedwe. UNkk Motshekga, ekhuluma engqungqutheleni yothishanhloko beNatu muva nje eThekwini wathi uzobiza umhlangano phakathi kwakhe, iNatu noDlungwane ukuze kubhekwane nezinkinga ezikhona.
INatu ikhala ngokungakhokhelwa kothisha abayitoho, othisha abasuke bebambele abagulayo nalabo abasemalivini okuyobeletha, ukungafiki kwezincwadi kwezinye izikole, ukungafakwa kwemali yokuthenga izincwadi nemali yezikole yokuthi zikhokhele izidingo nokugxila komnyango odabeni lokuthengwa kwamaqakelo adla u-R109 million ngonyaka.
UMnuz Allen Thompson, iPhini likaMengameli leNatu, uthe ingakho befuna ukuthi uNkk Motshekga athathe izintambo zokulawula umnyango wesifundazwe ngoba uDlungwane nenhloko yomnyango uDkt Enock Nzama bahlulekile ukuwuphatha.
Uthe mihla le bahlale befuna imihlangano abangayitholi emnyangweni wesifundazwe okunalokho baze balalelwe nguNkk Motshekga.