Isandla somthetho asiqine njalo hhayi uma kumatasa kuphela
KUSASA kuqala impelasonto yaPhasika futhi nezikole zivaliwe izolo. Lesi sikhathi ngesinye sezikhathi eziphithizelayo eNingizimu Afrika ngoba abaningi basuke beya ezinkonzweni, abanye bayagoduka kuthi abanye bazikhiphe bayoshaywa wumoya ngoba abaningi basuke behlabe ikhefu.
Lezi zindlela zidala isinyokotho emigwaqweni yakuleli ikakhulukazi lena emikhulu ehlanganisa iGauteng neKwaZulu-Natal kanjalo neGauteng neLimpopo kusukela namhlanje kuze kube nguMsombuluko.
Yize lesi kuyisikhathi sokuyodumisa nokujabula kwabanye kodwa futhi yisikhathi esiletha usizi kweminye imindeni ngenxa yesibalo esiphezulu sezingozi zomgwaqo ezibakhona ngalesi sikhathi.
Okubi kakhulu ngalezi zingozi ukuthi kunokuthi zinciphe unyaka nonyaka ziyanda futhi nesibalo sabantu abashonayo siyakhula.
Ngonyaka odlule kwashona abantu abangu-235 ezingozini zomgwaqo ngempelasonto yePhasika. Lesi sibalo sanyuka ngo-51% uma kuqhathaniswa nesibalo sabantu abangu-156 abashona ngo-2016.
Ngale kwabantu abashona, ngonyaka odlule amaphoyisa abamba abashayeli abangu-1 730 ngoba beqe isivinini esivumelekile; abangu-354 bahlawuliselwa ukulayisha ngokweqile; abangu-843 babeshayela ngaphandle kwezincwadi zokushayela kwathi abangu-380 babengenazo izimvume zokuthutha umphakathi.
Lezi zibalo ziyakhombisa ukuthi yinkulu inkinga emigwaqweni yakuleli ngePhasika futhi kudinga ukuthi kuthathwe izinyathelo ezinqala ukuze kushintshe lokhu.
Lezi zingozi zenzeka yize amaphoyisa esuke ethe chithi saka. Abashayeli bayaqhubeka beqise isivinini, bashayele bephuzile, bashayele ngaphandle kwezincwadi, bakhulume nocingo beshayela, balayishe ngokweqile yize besuke bazi ukuthi amaphoyisa aphume zonke izinkalo.
Lokhu kwenziwa ukuthi inkinga enkulu ngendaba yezingozi eNingizimu Afrika akusiso isiminyaminya, izingozi eziningi zibangwa yikho ukungahlonishwa komthetho nanokuthi amaphoyisa aqinisa isandla uma kuyizinsuku zebhizi njengalo iPhasika.
Isandla kumele siqine zonke izinsuku kubantu abaphula umthetho emigwaqweni ngale kwalokho siyohlale sikhala njalo emva kwezimpelasonto ezifana nePhasika.