Sengikipite nale ndoda 17 weminyaka umshado dololo
EZOTHANDO
UMBUZO: Sengibe ‘kulo mendo’ iminyaka ewu-17 kodwa namanje akakangishadi, sihlala ndawonye. Sisebenza ndawonye ebhizinisini lakhe. Wangitshela ukuthi ufuna ukuthatha isithembu, wazalisa intombazane yangasekhaya. Okungiphatha kabuhlungu ukuthi impilo ebesiyiphila isishintshe kakhulu, nemali angisayiboni. Useyinto ehlezi ingenamali. Kanti nale ntombi yakhe uyiletha egcekeni emzini wami, ikakhulukazi uma kunemicimbi. Akakhulumi lutho nami, wenza okuthandwa inhliziyo yakhe. Akusekho ukujabula kulo muzi.
Igama ligodliwe, eManzimtoti Impendulo: Iminyaka ewu17 miningi kakhulu uhlala nomuntu. Kodwa isibindi sokuhlala nomuntu iminyaka engaka engakushadile usithathaphi? Ngaphandle kwesitifiketi somshado akulula ukuba nelungelo ezintweni zakhe ngoba nifana njengabantu abebezihlalele nje. Okwenza nokuthi lo wesilisa ohlezi naye azenzele umathanda ngoba uyazi ukuthi asikho isibophezelo somshado phakathi kwenu. INingizimu Afrika ayinawo umthetho ovikela abakipitile ukuze bathathwe njengabashadile.
Wena esikhundleni sokulwela indoda ekusobala ukuthi ayikuhloniphi, zibuze ukuthi uyafuna yini ukuhlala impilo yakho yonke ngaphansi kwengcindezi enje. Siphakamisa ukuthi niye kubameli ukuze banenzele isivumelwano sokuhlalisana esizokwazi ukuma nasenkantolo uma kwenzeka kuba khona la ningaboni ngaso linye. Noma ningakipita iminyaka ewu-50, umthetho ngeke unithathe njengabantu abashadile.
Umbuzo: Ngiyingoduso osekusele umshado kuphela ngipheleliswe. Umyeni wami uthatha izinqumo nezithinta imali, ngaphandle kokungazisa. Uphila impilo yakhe yedwa noma ngikhona empilweni yakhe. Lokhu kuze kwaba nomthelela ongemuhle ebhizinisini ngenxa yezinqumo azithatha engabonisananga nami. Ngabe kuwukugagamela yini uma ngizithathisa okwengxenye yempilo yakhe yize singakashadi? Sengiqala nokulingabaza ikusasa lethu ngenxa yalokhu kuziphatha kwakhe. Angikwazi ukuphila nomuntu esingekho mqondo munye naye.
Nombuso, Inanda
Impendulo: Ngokomthetho, umshado uqala mhlazane nenza isivumelwano phambi komfundisi noma enkantolo, nasayina phansi ukuze nithole isitifiketi. Indlela umuntu aziphatha ngayo ngaphambi komshado inokuveza izimpawu zokuthi uzoziphatha kanjani uma seshadile. Ngakho akukona ukugagamela uma wethula izimfuno zakho ningakashadi.
Iyona ndlela yokuzanelisa ukwazi ukuthi kuyini lokhu ozifaka kukho nale ndoda.
Umbuzo: Siyathandana nonkosikazi wami kakhulu. Kunye kuphela okusixabanisayo, umakhalekhukhwini. Mina ngikholwa ukuthi ifoni yami, eyami. Angiyiphathi nhlobo eyakhe, ngisho isikhala. Kodwa yena uzibona enelungelo lokuphendula, aze aphenye ifoni yami. Akukho lutho engikwenzayo eceleni engikufihlayo. Ukuthi indlela nje esikhule ngayo ekhaya. Into yomunye umuntu uyayihlonipha, kuze kube uyena okunikeza ilungelo lokuyithatha. Yena ukholwa ukuthi kufanele kuvuleleke nje, omunye azitamuzele ezintweni zomunye. Imibono yethu sobabili iqinile ngalolu daba.
Mfanafuthi, eMnambithi
Impendulo: Mfanafuthi thola ukuthi yini imbangela yokuthi unkosikazi wakho angakwethembi. Sicela ukuphendula ngendlela thina esenza ngayo, okungasho ukuthi nawe yenza njalo. Emshadweni ayikho into yomunye. Angithi senimuntu munye? Ngakho asikho isidingo sokubanga ucingo. Ukuphila impilo evulelekile kuyawuqinisa umshado. Sikusho lokhu ngoba njengabantu beniphila izimpilo ezahlukene phambilini. Kusengenzeka ukuthi unkosikazi wakho wenza lokhu akwenzayo ngoba wake waba sebudlelwaneni nomuntu owayengathembekile kuye. Ziningi izinto ezibalulekile emshadweni ngaphandle kocingo. Ungazincishi ubumnandi bomshado ngenxa nje yefoni. Wena nje unomthwalo wokuqinisekisa nokukhulisa ukwethembana phakathi kwakho nomkakho. Indlela okuyiyona yokwenza loku ukumnikeza imvume yokubheka nanoma yini kumakhalekhukhwini wakho.
Uzothola ukuthi akukona ukuthi kukhona akusolayo ingoba usuke ngempela kukhona akudingayo efonini yakho. Akuyena wonke umuntu othinta ifoni yomunye osuke kukhona akusolayo.
Qinisekisa umkakho ngothando lwenu. Ungavumeli into encane njengefoni ingene phakathi kwenu nize nixabane. Uzothola ukuthi into emenza kubesengathi kukhona akusolayo ingoba ubona ungafuna asondele efonini yakhe. Ukuvuleleka kwakho kungashintsha ngisho nendlela enza ngayo unkosikazi wakho. Xhumana nathi ku Facebook: Mo & Phindi Instagram: Mo_Phindi Email: info@moandphindi. com