Uyabonga umndeni kaStu Ndlovu
MHLELI: Siwumndeni kaStu Ndlovu, umama Thandiwe “kaMakhoba” Ndlovu nabantwana, ubaba Vo nokhulu MaMgidi, sifisa ukubonga bonke laba ebebesisingethe sihanjelwe ubaba wethu. Sibonga kwiNingizimu Afrika yonkana njengoba amazwi enduduzo abevela zinkalo zonke kusukela kufike umbiko wokuthi ubaba akasekho emhlabeni ngolwesibili olwedlule.
Kunabantu abaningi namabandla ezenkolo ahlukahlukene ebefika ekhaya ezosikhulekela, asiphe neminikelo, sithi kubo bonke uNkulunkulu aze ababusise.
Sibonga nezinkumbi zabantu eziphumelele enkonzweni yokugcina kababa, zadela konke zaxova udaka ukuzosisingatha.
Kunalaba abenze konke okusemandleni abo ukwenza inkonza kababa ibe ngemfanele nenesizotha esifisa ukudlulisa amazwi okubonga kubo:
* Ibandla lakithi i-Apostolic Church Southern Africa (ACSA) ikakhulukazi iKwaMashu District ngaphansi kobuholi bukaMfundisi Nxele.
* Umphakathi wakithi Ezimpondweni ovule imizi yawo wakhipha nezimpahla ekulekeleleni ekuthini konke kuhambe kahle.
* Induna uMthalane nesigodi sonke sakwaShangase esiphume ngobuningi baso ukuzolungisa indlu yokugcina kababa.
* Ithimba ebelisiza ekhishini ukulungisa isidlo sosuku senze omkhulu umsebenzi.
* UMasipala wesifunda Ilembe, uMasipala wangaphakathi iNdwedwe Local ngaphansi kweMeya uChili nekhansela lakuward 17 ikhansela uMncedisi Magubane. Basilekeleke kakhulu ngezidingo ngqangi, ekulungiseni umgwaqo nokuletha amanzi kwazise lezi zidingo zisantula emphakathini wakithi.
* Abaholi bomphakathi abaningi abahambele inkonzo esingabala kubo iMeya yaseNdwedwe uChili, umhlonishwa Nonzwakazi Swartbooi-Ntombela, umhlonishwa uNonhlanhla Khoza kanye nomhlonishwa uDorah Dlamini.
*SABC, nabasakazi bonke abaphume ngobuningi babo bezophelezela uzakwabo beholwa ubaba uMthembu ophethe kwezezindaba. Ukuba khona kwabo kusithobisile njengomndeni.
*Umnyango wezemfundo esifundazweni nezinyunyana zonke ngamazwi enduduzo.
* Izintatheli zonke ezikhungweni ezehlukene zezindaba, ngokubika kahle ngobaba nokukwazi ukusidlulisela imibiko nemininingwane yonke okwenze kwaba lula ukufinyelela kubantu ngokushesha.
Siswele imilomo eyizinkulungwane yokubonga. Sithi nje abakwenze kithi bangaphezi bakwenze nakwabanye.