I-CPF yaseMbazwana ayihlangene nakancane nokushiswa komuzi wenyanga
Abazithobayo, UMNDENI WAKWANDLOVU MHLELI: Ngifisa ukucacisa mayelana nodaba lwezinsolo ezisabalalisa okomlilo wequbula zokuthi ikomiti elibhekele ezokuphepha eMbazwana liyathinteka ekushisweni kwezindumba zomelaphi wendabuko wasendaweni okunguMnuz Siyabonga Mdluli emasontweni amabili edlule.
Lolu daba lukhulumeka isinxele njengoba lungelona iqiniso.
Kuyiqiniso ukuthi lesi sigameko sivelile endaweni kodwa hhayi ngesandla sohlaka lwamalungu eCommunity Policing Forum (CPF). Abantu abenza lokhu bangamalungu omphakathi ayeholwa abathile abazibiza ngeForum.
NgoMgqibelo womhla ka-24 Mashi, eBuhlebuyeza ehholo lomphakathi, induna yesigodi saseMahlakwe, KwaMhlabuyalingana kuWard 7, ubaba uMlondo Nxumalo, ibize umhlangano nomphakathi kukhona nezinye izinhlaka ezithintekayo ngenhloso yokukhuza umkhuba wokuzijezisela kwabantu kwabasolwa ngokuthile.
Kulowo mhlangano kwacaca ukuthi abathintekayo kulolu daba bafika emzini wenyanga bazibiza njengabantu abalwa nobugebengu, nokungelona iphutha ukuthi bazichaze kanjalo njengalokhu ziziningi izinhlaka ezilwa nobugebengu esikhathini samanje ikakhulukazi ngoba nezinga lobugebengu seliphezulu kangaka kule ndawo. Abantu vele sebaphila impilo yokwakha amaqoqwana ukuze bazivikele kodwake kubalulekile ukuthi balandele imigudu esemthethweni nxashane benza lokhu.
Kungaba yiphutha ukuthi nxa abantu benza lezi zinhlaka bese beyanyaniswa nohlaka lweCPF, yize noma sebezichazile ngokuthi bona bayiForum.
Empeleni igama elithi Forum alimane nje lihlobane neleCPF ngoba noma ngubani unelungelo lokusungula inhlangano yakhe yanoma yiluphi uhlobo uma ehlose ukubhekana nanoma yisiphi isimo. Kodwa lezo zinhlangano akusho ukuthi sekumele zibizwe ngeCPF.
Kungalezi zizathu ngibone kubalulekile ukuthi ngichaze okuyikona kona ukuze nongazi azi ngokwenzeka. Themba Xolani Zikhali USIHLALO KEKOMITI LEZOKUPHEPHA EMBAZWANA, KWAMHLABUYALINGANA