Akusenamicikilisho uma ufuna ukuba nesikweletu
ABANTU sebezokweletelwa noma bengasebenzi futhi bengenawo ama-akhawunti asebhange.
Lezi zindaba ziphume ngesonto eledlule emuva kokuthi izitolo ezinkulu okubalwa kuzo uTruworths, Foschini noMr Price zikhale ngokuthi abantu abaningi bagcina bengakwazi ukuthola isikweletu yize bekwazi ukusikhokhela ngenxa yokuthi abanawo amaakhawunti asebhange futhi abaqashiwe.
Lezi zitolo zithe kunabantu abadayisa emgwaqweni abangakwazi ukuthola isikweletu ngenxa yokuthi abanawo ama-akhawunti asebhange ne-payslip.
Ngesonto elidlule uJaji Keith Engers wenkantolo yaseWestern Cape unqume ukuthi abantu mabanikwe isikweletu noma bengasebenzi ndawo, inqobo nje uma abezitolo bekwazi ukubona ukuthi abantu bazokwazi ukuzikhokhela izikweletu zabo.
Njengoba kuphume lesi sinqumo abasiza abacwile ezikweletini bathe siyakhathaza ngoba kusho ukuthi baningi abantu abazocwila ezikweletini ngenxa yokuthi akusadingeki ukuthi beze nezincwadi zasebhange nama-payslips.
UMnuz Neil Roets wenkampani iDebt Rescue, uthe isinqumo senkantolo sizoba nomthelela omubi kubathengi ngenxa yokuthi bazokweletelwa ngaphandle kokubheka imicikilisho eminingi.
“Lesi sinqumo sizokwenza abantu bazitshele ukuthi kufanele bakwelete ngisho bengenawo amandla okukhokha. Lokhu kuzolwisana neNational Credit Act elwisana nokukweletelwa kwabantu ngendlela engekho semthethweni. Izitolo zizofana nomashonisa manje,” kusho uRoets.
Ubuzile ukuthi uma izitolo zingeke zisebenzise izitatimende zasebhange nama-payslips kuzokwenziwanjani.
“Angiqondi ukuthi zizobonwa kanjani izindleko zabantu uma kungezukubhekwa umlando wabo wokukhokha. Uma ungenawo umlando womuntu wokukhokha kusho ukuthi uzomboleka imali kuhle kukamashonisa,” kusho uRoets.
Unxuse abantu ukuthi bangalokothi bathathe amakhadi abavumela ukuthi bathenge ezitolo eziningi ngoba afana ncamashi nekhadi lokukweleta.
“Abantu akufanele bajabulele amakhadi okuthi abathole izikweletu ezitolo eziningi ngoba lokhu kufana ne-credit card. Isikweletu okufanele usithathe ngesomuzi noma esemoto hhayi ezincane,” kusho uRoets.
Imizamo yokuthola ukuphawula kweNational Credit Regulator ayiphumelelanga njengoba ingayiphendulanga imibuzo ethunyelelwe yona nge-email.