I-IEC ikhala ngokuntula imali
INHLANGANO eyengamele ukhetho eNingizimu Afrika i-Independent Electoral Commission of South Africa (IEC) ikhala ngokuswela imali yokuthuthukisa ubuchwepheshe besimanje ukuze ilungele ukhetho lwangonyaka ozayo.
Umphathi we-IEC uMnuz Sy Mamabolo utshele amalungu ePhalamende ukuthi badinga ukuthuthukisa ezobuchwepheshe ukuze balungele ukhetho lwangonyaka ozayo.
“Imali esiyitholayo ayanele ukuthi senze wonke umsebenzi wethu.
“Izinhlelo zobuchwepheshe zixhaswe ngemali encane kanti sidinga ukuzilungisa ukuze ukhetho lwangonyaka ozayo luhambe kahle,” kusho uMamabolo.
Uthe kufanele bathuthukise ubuchwepheshe ababusebenzisa kumakhompyutha abo, kuma-laptops nakukho konke CHURCH IN SOUTH AFRICA: abasebenza ngakho.
Uthe badinga ukuthenga amaZips-zips okuyimishini abayisebenzisayo ukubhalisa abavoti neminye imishini engu38 000 yokubhalisa abavoti abasha.
Uthe babeke u-R976 million ukubhekelela ukhetho lwangonyaka ozayo.
Uveze ukuthi badinga u-R46 million ukuthenga imishini emisha nokuthuthukisa ezobuchwepheshe.
Mayelana nohlelo lokubeka obala abaxhasi bamaqembu epolitiki uMamabolo uthe badinga u-R45 million ukulwenza kodwa banikezwe u-R20 million kuphela.
Uthe ukuphatha imali yamaqembu wumsebenzi omkhulu odinga babe nengqalasizinda esesimweni esifanele.
USotswebhu we-ANC ePhalamende, uMnuz Jackson Mthembu uthe kubalulekile ukuthi imali exhasa amaqembu epolitiki ilawulwe yi-IEC ukuze kucace ukuthi axhaswa ngabantu abanjani.
Uthe ukungabikhona kwemali eyanele yokuxhasa i-IEC kuzoba yinkinga.