UKomphela ubalisa ngezimbangi zakhe
ENZA kwabanye lokhu ongathanda kwenziwe nakuwena’. Lezi zinhlamvu uziphinde kaningi enkulumeni yakhe umqeqeshi weKaizer Chiefs, uSteve “Mphathi” Komphela, ogcine engashongo ukuthi uzibhekise kubani. UKomphela, osekucacela nekhasela eziko ukuthi uzophuma ngesango eNaturena ekupheleni kwesizini, ushintshe ebusweni ekhuluma ngabacathamela isikhundla sakhe kwiChiefs ekubeni esekhona.
Bekucaca ukuthi usho kumqeqeshi othize kodwa inkulumo ubeyembesa, esabisa nangokuthi ukube ungomunye umuntu ngabe udalula esikhulwini seqembu lo mqeqeshi asebenza kulo ukuthi kwayena akamsulwa. Kubaqeqeshi okuvele ukuthi bangase bavale isikhala sikaKomphela kwiChiefs kukhona uLuc Eymael, opheka iPolokwane City ofake iTownship Rollers yaseBotswana kowamaqoqo weCAF Champions League noNikola Kavazovic waseSerbia.
“Angizizibi izinto futhi kufanele ngibhekane neqiniso. Iqiniso limile. Nginomthwalo wokwenza umsebenzi kwiChiefs kuze kube wumzuzwana wokugcina. Ngokwezifiso ezivela ngaphandle, akukho okubi ngalokho. Wonke umuntu ufuna umsebenzi ophezulu. Uma umuntu ethi angathanda ukuwenza, kuvumelekile, akukho okungalungile kulokho. Ukuba benginikwe ithuba lokuba ngusopolitiki bengizoba ngobusa ngentando yabantu hhayi undlovukayiphikiswa,” kusho uKomphela.
“Kodwa kwesinye isikhathi kuyamangaza uma uzakwenu ephumela obala ngezinto ezenza ulingeke ukuphawula ngazo. Ngafundiswa ngabazali bami ukuthi thula, uma into ozoyisho ingeyinhle, vala umlomo. Ngikhetha ukuvala umlomo wami. Kwesinye isikhathi uyacabanga ukuthi mhlawumbe ngelinye ilanga uma sekudlule konke, sengikwenye indawo ngiyokhuluma ngakho kodwa kuzothiwa kungani engakhulumanga esekwiChiefs. Ngabe usenomona noma uveza obekufihliwe?
Isexwayiso kozakwethu: kuqaphele okufisayo ngoba ungakuthola. Uma ngihlukana ngombono nozakwethu okhuluma ezidlangaleni ekubeni esasebenza kwenye indawo, nami kusho ukuthi kufanele ngazise abaqashi bakhe ukuthi akathembekile. Lokhu kuyisitatimende sokuthi ukuthula kukuvikela ezintweni eziningi. Kuveza nokwethembeka kwakho ungumqeqeshi ukuthi unomsebenzi kodwa uzama ukuketula omunye umqeqeshi. Okwenza kwabanye kungenzeka kuwena. Yenza kwamanye lokho ofisa bakwenze nakuwena. Akusho mina, kusho iBhayibheli. Ngiyabacela abazame ukusuka endleleni. Bakhona, ngiyabezwa kodwa mina ngikhetha ukuthula. Ukubuka ngiyabuka, ukuzwa ngiyezwa kodwa ngesiXhosa sithi “amasi abekwe elangeni. Akukho okubi ngokuthi abantu bafune ukusebenza kwiChiefs.”
UKomphela usazingela isicoco sakhe sokuqala kusukela efike eNaturena kumasizini amathathu. Ubhekene nerekhodi lokuba ngumqeqeshi wokuqala ukuphuma ePhefeni eshwiba izandla. Uzohola Amakhosi uma esebhekene neBaroka emdlalweni we-quarterfinal weNedbank Cup eNelson Mandela Bay Stadium, eBhayi, ngoMgqibelo ngo-8.15 ebusuku.
“Imidlalo iBaroka eyidlale neChiefs, ihlale isinika inkinga kusukela isadlala kwiNFD. Wonke amaqembu uma ebhekene neChiefs ayazimisela. Asilindele okuhlukile. Kodwa okwethu wukusebenza sidlulele kowandulela owamanqamu. Ngingathanda ukuthi abadlali le ndebe bayiwinele abalandeli,” kusho uKomphela.