Ubuchwepheshe obuzochaza abashayeli
SEKUSEDUZE ukuthi kube lula ukuthi izimoto zizishayele ngokuphelele ngaphandle kokusizwa ngabashayeli.
Muva nje iJaguar Land Rover ibihlola izimoto zayo ukuthi zikwazi zona ukuzitholela indawo yokupaka ngaphandle kokusizwa wumshayeli.
Ukuhlolwa kwemoto kwenziwe emigwaqweni yaseMilton Keynes njengengxenye yokusebenzisana phakathi kweJaguar Land Rover ne-UK Autodrive, okuyinhlangano ehlola izimoto ezizishayelayo nezixhumene ngobuchwepheshe.
UJoerg Schlinkheider oyiJaguar Land Rover Chief Engineer, Automated Driving, uthe batshala kakhulu ebuchwephesheni bezimoto ezizihambelayo nokwenza impilo yamakhasimende iphephe futhi ibe lula.
“Ukunciphisa ingcindezi yansukuzonke yokushayela njengokungena ezikhaleni ezincane zokupaka, kusho ukuthi singakwazi ukugxila ezintweni zokujabulela izimoto zethu.”
IJaguar Land Rover iphinde yaqhamuka nobuchwepheshe obuzosiza ekutheni kusheshe ukusebenzisa izimoto ezizihambelayo. Ubuchwepheshe benza ukuthi izimoto “zikhulume” zodwa nangokuseduze kwazo bese zinikeza umshayeli imininingwane eqondile ngesikhathi ayidinga ngaso futhi igweme isimo esithile ngokushesha.
Le nkampani isihlole izinto ezimbili eMilton Keyness okuyiEmergency Vehicle Warning ne-Electronic Emergency Brake Light.
I-Emergency Vehicle Warning (EVW) itshela umshayeli uma kukhona imoto yesimo esiphuthumayo eqhamukayo bese iyasho futhi nokuthi iqhamuka ngakuphi.
I-Electronic Emergency Brake Light (EEBL) itshela umshayeli uma enye imoto exhumene nabo ibamba amabhuleki mawala, bese inikeza umshayeli ithuba elanele lokuvika ingozi.
IJaguar Land Rover iqhamuka nobuchwepheshe bokuthi imoto izishayele ngokuphelele noma kancane ukuze umshayeli azikhethele.