Asifase amabhande ukuze siphephe
AKE siphinde sizothe kwazise selifikile iPhasika lansondo. Ngalesi sikhathi sonyaka iningi lethu lisemgwaqweni ngezizathu ezehlukene. Abanye bayajoja, abanye baya ezinkonzweni kanti abanye basashaya izindawo nje. Masithi gozololo eceleni komgwaqo siqinisekise ukuphepha kwabo bonke abasebenzisi bomgwaqo.
Mayiphumule endaweni ephephile insimb’yomlungu abagibeli nomshayeli bathole ithuba lokuphuma emotweni belule izinyawo. Kukude lapho kuyiwa khona ngeke sivele siyishaye umshaw’ushile singaphumuli.
Namhlanje sicaphuna enye yezincwadi eziningi ezivela kubafundi bale ngosi. Le ncwadi isukela esihlokweni esixoxe ngaso emasontweni ambalwa edlule lapho besizama ukuxwayisa abantu ukuthi bangehlulelani ngohlobo lwezimoto abahamba ngazo. Lena-ke iphuma kuNksz Thuli Makhanya ifundeka kanje:“Hi Sthe Ingihlaba umxhwele ingosi yama-Hazard, ikakhulukazi lena osanda kuyikhipha mayelana nohlobo lwezimoto okuthiwa zihamba abantu abathile.
Kuyiqiniso ukuthi abantu basibuka ngezimoto esihamba ngazo kanti kuningi okuba yizizathu zokuthi sisebenzise noma sithenge izimoto ezithile. Isicelo sami sithi ngicela uyifake nasemsakazweni le ngosi kusizakale nabantu abaningi kanti nezinga lokushayela budedengu lenyukile futhi akubona abashayeli abathile noma abahamba ngezimoto ezithile kuphela abayizephulamthetho kodwa cishe bonke.
Abashayeli abaningi bavele bajike bengazange bakhombise, abanye bavele bame nse bathi bhadla phakathi nomgwaqo noma lapho kungavumelekile ngaphandle kokuxwayisa okungamanye amaphutha adala izingozi. Singajabula uma ungayixoxa kabanzi le ndaba. Siyabonga niqhubeke nomsebenzi omuhle.
Ozithobayo uThuli Makhanya.”
Akuphelanga ngisho inyanga uNksz Makhanya ethumele le ncwadi kwasabalala i-video yemoto eyisithuthi somphakathi itekisi igagamela ukuwela umfula ugcwele udla izindwani yathathwa amanzi yemuka nabagibeli. Isolezwe kuphela eliwela umfula ugcwele hhayi imoto. Lesi sigameko singenze ngabona ukuthi incwadi kaNksz Makhanya mangiyithathele phezulu ngiyiphuthumise yize ngazi kahle ukuthi sekukaningi sixoxa ngokushayela budedengu nokuba nesineke ezimweni ezifana nalesi.
Angithi iningi lethu lizobe ligcwele imigwaqo ezimweni ezingafani kuhle sikhumbuzane ezokuphepha ngaphambi kohambo. Ngike ngathi ngixoxa nabanye abantu abanolwazi lomthetho mayelana nalesi sigameko bathi, umshayeli owenza kanje angabekwa icala lokubulala nelokuzama ukubulala ngesenzo sakhe sokufaka imoto igcwele abantu emfuleni odla izindwani.
Lesi simo singikhumbuza esehla eminyakeni edlule eKapa lapho umshayeli wetekisi ethutha izingane zesikole aphoqa ukwedlula umgoqwane kajantshi uvimbile maqede imoto yakhe yagugulwa yisitimela kwashona izingane ezingu-10 kuleyo ngozi noma angithi kulokhokubulala. Loyo malume walahlwa yicala lokubulala kodwa emva kwesikhathi wafaka isicelo sokudluliswa kwecala sabuyekezwa isinqumo walahlwa yicala lokubulala ngephutha.
UJub-jub yena akabanga naleyonhlanhla ngoba wahuqa izidakamizwa maqede wancintisana nomngani wakhe njejubane lezimoto zabo kanti bazoshayisana qede bayophonseka ezinganeni sesikole kwashona inqwaba kanti ezinye zaphenduka izinkubela. UJub-jub walahlwa yicala lokubulala wadonsa iminyaka ejele.
Umbono wama-hazard uthi abomthetho abanawo amandla okunqanda ubudedengu emgwaqweni kodwa abashayeli yibona uqobo abangaqeda lesi sihlava. Masizijwayeze ukubopha ibhande uma sisemotweni. Sikwenze kube yijwayezi ukuqalaza bese siyakhombisa ngokushaya izibani ezifanele ngaphambi kokuthi sichezuke.
Masiqinisekise ukuthi sikufaka egazini ukushaya ama-hazard njalo uma sibona isimo esiphazamisa ukuhamba ngokukhululeka kwezimoto ukuze abasilandelayo babone ukuthi sekunesiphazamiso ngaphambili. Masizihlole izimoto ukuthi ziyakhanya zonke izibani, amasondo asaphila nokuthi ithelile yini ngaphambi kokuthi uyifunze isicathulo. Isimo sempilo yemoto sibalulekile ukuthi sihlale siqondile bese kuba nesomshayeli sibe ngesiqondile ngokwengqondo namagunya nezincwadi konke makube kuqondile futhi kuphethwe bese luqalake uhambo.
Hhayi-ke masiyibambe lana ngethemba lokuthi kuzwakele nePhasika lizosiphatha kahle, siqhubeke nokushayela ngokubuswa nokuhlonipha imithetho yomgwaqo yakuleli lengabadi. Uma usafuna siqhubeke nokuyixoxa le ndaba ngena ekhasini lethu Igedlela Lami with Sthembiso Shangase kuFacebook. Yimi owenu nali ikheli ngezansi hazardiso@gmail.com