Irekhodi elisha kwi-2018 Engen Polo Cup
IQALE ngegiya eliphezulu i-2018 Engen Polo Cup eKyalami ngoMgqibelo owedlule lapho abashayeli bebehamba ngePolo GTI entsha.
NgoMgqibelo ekuseni, kusahlelwa ukuthi izimoto zizoqala kanjani, bekuminyene utshumo ezimotweni eziyisithupha ziholwa phambili umshayeli osemncane uJeffrey Kruger we-Universal Healthcare Polo.
UKruger ugcine eqala endaweni yokuqala ngaphambi kukaJonathan Mogotsi (VW Motorsport Polo), Juan Gerber (Gerber Motorsport Polo), Tasmin Pepper (Electric Life Polo), Keegan Campos (Turn 1 Polo) noShaun La Reservee (Alpine Motors Polo).
Emjahweni wokuqala uKruger uqale kahle. Uzihole phambili kusukela kuqala kwaze kwayophela futhi uqophe irekhodi elisha eKyalami le-Engen Polo Cup ngo-2 min. 7.925 seconds.
Abebempintshe eduze nguMogotsi, Gerber, Pepper, Campos noLa Reservee. UCharl Wilken (Cronje’s Auto Body Polo), Benjamin Habig (Just Tools Polo), Delon Thompson (A&L Materials Polo) noClinton Bezuidenhout (GLYCO Polo) bakwabaphume kwabangu-10 abaphambili.
Umjaho ubulandela imoto ebibeka ijubane ama-laps amane ngemuva kokuthi uRaais Asmal (VW Motorsport Polo) noSimon Need (Photonics Polo) bashayisane base beshayisa udonga lwamathayi.
Emjahweni wesibili kubonakale uGerber noMogotsi babanga ukuzihola phambili baze bashayisana baphuma bobabili. Lokhu kuholele ekutheni uGerber angabe esakwazi ukuqhubeka nomjaho.
UKruger uzihole phambili elandelwa nguPepper kuyoqedwa obelandelwa nguCampos, La Reservee, uMogotsi noBezuidenhout.
Ezinye izindawo ezine zithathwe nguWilken, Thompson, Daniel Duminy (SMD Group Polo) noDarren Oates (PAYEN Polo).
UJeffrey Kruger ugcine eba ngumshayeli wosuku kwathi uTasmin Pepper onqobe emunxeni weMasters waphuma endaweni yesibili.
UKeegan Campos, Jonathan Mogotsi, Shaun La Reservee noCharl Wilken baphume kwabayisithupha abaphambili.
Umzuliswano olandelayo we-2018 Engen Polo Cup uzoba seWestern Cape Killarney Circuit ngo-Ephreli 21.