Ziyethembisa izinguquko kweyeSABC
UKUQALA kwenyanga entsha u-Ephreli kuze nezinkulu izinguquko ezweni sakhile. Ngaphandle nje kokuthi sesiphoqeleka ukuthi singene sigamanxe emaphaketheni ngemuva kokunyuka kukaphethroli nentela iVAT, esingu-15%, kuphinde kwenzeka nezinguquko emisakazweni.
Kuhlale kuyinto elindelekile ukuthi ngalesi sikhathi kwenziwe izinguquko ikakhulukazi emisakazweni engaphansi kweSABC.
Kuningi-ke ukukhuluma ngalezi zinguquko, nami ngeke ngisale ngaphandle ngingabeki amabili noma amathathu.
Ngizoqala eduze nje ku-100 KE Masinga Road eThekwini, nokuyikhaya lomsakazo ohamba phambili ngabalaleli Ukhozi FM.
Kuhlale kukukhulu ukuphawula ngezinhlelo zakulo msakazo. Kuhle ukuthi abaphathi bazizwile izikhalo zabalaleli kwezinye izinhlelo.
Ekuseni uSgqemeza ubezwakala ukuthi unesizungu, kwesinye isikhathi aze afune ukuxoxa nomdidiyeli uHlengiwe Mbatha. Angizami ukuzikhukhumeza, kodwa le ngosi yiyo eqale ukubhala ngesizungu sikaSgqemeza.
Kube kuhle ukuthi abaphathi bamtholele umsizi onjengoVukile Nongcebo McKenzie.
UNongcebo muhle ngoba uphuma ohlelweni lwezingxoxo, iSithakela Isizwe, ngiyethemba ukuthi uzoza nalo lolo lwazi asithakele nathi njengabalaleli izindaba ezintsha.
Ngisishayela ihlombe isenzo sokuthi uNkosinathi Mshengu kube nguye onikezwa uhlelo obelwenziwa nguNongcebo uma kuyiSonto, Ezingasoze Zabuna. Nginethemba lokuthi uzophela lo mqondo wokuthi kulalelwa iMetro FM kuphela ngeSonto. Vele uMshengu nguye “udokotela wothando” emsakazweni.
Ukulandwa kukaMdonso Ngcobo kwiZululand FM kuyancomeka kakhulu ngoba uyawuqonda umculo wesiNtu. Uma esakaza eZululand FM bekuvele kugcwale abantu bezombuka bukhoma.
Ngiyakhumbula nomculi ongasekho uMtshengiseni “Indidane” Gcwensa wambala kwenye yezingoma zakhe ethi Iyodibana Nini.
Kubuyise nethemba ukuthi kanti emsakazweni womphakathi kusaqalazwa ngakhona kubhekwe ithalente njengoba belandiwe noThokozani “MaFresh” Mpungose noLindani “Lee” Hlophe.
Kuzokwenza nezinga lokusakaza eziteshini zomphakathi likhuphuke kakhulu ngethemba lokuthi kukhona abazoziveza balandwe.
Sikubheke ngabomvu ukubona ukuthi lezi zinguquko zizothela izithelo yini, kunyuke izibalo zabalaleli njengokufisa kwabaphathi. Njengamanje Ukhozi lunabalaleli abangu-7.274 million kanti bafisa ukuthi bafinyelele ku-7.5 million.
KuMetro FM ngibone kulandwa uTembisa Mdoda ozakhele ugazi ngokwethula i-Our Perfect Wedding. Uma ngikhumbula kahle, uke wabamba kwiTouch HD okusho ukuthi amava uwathole khona ngaphambi kokuthi alandwe.
Kuhle ngoba abaphathi babonile ukuthi bashaya isikhala ngokuhlukana noRobert Marawa ngoba kusukela kwathatha u-Udo Carelse noMpho Maboi uhlelo alubange lusafana.
Sikubheke ngabomvu ukuzwa ukuthi uThomas Mlambo uzoza nani. Kodwa-ke ungumuntu ozaziyo ezemidlalo. Okwakwenza uMarawa athandwe ukuzethula zishisa futhi enganqeni ukubuza imbuzo izimenywa. Yilokho esikulindele.
Ungangibhalela ku-fanelesibonge.bengu@inl.co.za noma kuTwitter @fanelebengu noma ku-Instagram @fanelebengu