‘Kube yisibusiso ukushaywa yiChiefs’
UMQEQESHI weBaroka FC, uMaDonald Makhubedu, ukufanise nesibusiso ukuwashiswa ijezi yiKaizer Chiefs emdlalweni we-quarterfinal yeNedbank Cup obuseNelson Mandela Bay Stadium ngempelasonto.
IBaroka iguqe ngo 1-0 wegoli likaEric Mathoho. Leli qembu laseLimpopo bekubhekwe ukuthi liphinde liyigile iChiefs njengoba lenza ngo-2011 lisayibamba kwiSafa Vodacom League.UMakhubedu uthe akusekho ukwenza ngokunye ngaphandle kokuqinisa emidlalweni ye-Absa Premiership lapho beyibambe endaweni yesikhombisa ngamaphuzu angu-32.
Kwale kancane ukuthi iBaroka idliwe yizembe ngesizini edlule ijika emidlalweni yokuhlunga njengoba.
Nokho uMakhubedu akaboni bephephile njengoba efuna balwele ukunqoba yonke imidlalo yabo elandelayo, okubalwa kuyona owePlatinum Stars kusasa eRoyal Bafokeng Stadium, ngo-7.30 ebusuku.
“Uma ubheka i-log kule sizini, kusukela kunombolo 4 kuya endaweni ka-16 akekho ophephile.Yingakho ngikufanisa nesibusiso ukuphuma kwethu. Sekuzomele sigxile emidlalweni yeligi, eyemikhumulajezi sizoyibona ngesizini ezayo uma sikwazi ukugcina indawo yethu kwiligi.
“Sinemidlalo enzima kwiligi, owePlatinum Stars, elwela ukuvika izembe, noweMamelodi Sundowns, ebanga isicoco,” kusho uMakhubedu.
Njengoba sekusele imidlalo eyisithupha kusongwe iligi, iBaroka yehlukaniswe amaphuzu angu15 neStars eyivale emsileni. Uma ingadedela amaphuzu kule midlalo bese amaqembu angaphansi kwayo eqoqa amaphuzu, ingazithola seyehlela kule ndawo eyingozi. Iqembu eliqeda endaweni ka-16 ligawulwa yizembe, liyodlala kwiNational First Division (NFD), kuthi eliqeda endaweni ka-15 lidlale kuma-Play Off namabili asuka kwiNFD.