Bajuxuza ibe inwetshwa iMax’s Lifestyle
BAJUXUZA kube kuqhuma ipiki nefosholo eceleni abantu abahambela iMax’s Lifestyle, eMlaza, njengoba le ndawo ithuthukiswa.
Umnikazi waseMax’s Lifestyle, uMax Mqadi, utshele leli phephandaba ngesikhathi livakashele khona ukuthi inhloso yalokhu kuthuthukiswa wukuthi indawo yakhe ibe sezingeni lomhlaba.
Uma uqhamuka khona kuvulwe uhhafu kanti omunye uhhafu uyalungiswa. Kuvulwe nendawo yokuwasha izimoto enendawo yayo yokuhlala nokuthengwa kuyo iziphuzo ebizwa ngeNkandla.
“Kuzoshaya iDurban July isiphelile. IDurban July yiwona mcimbi esizovula ngawo le ndawo. Sibone ukuthi indawo iba ncane, yingakho sithe asinwebe. Sakha indawo entsha yezicukuthwane namathoyilethi amasha. Kubalulekile ukutshala ebhizinisini ngoba nabantu bayatshala kulo,” kusho uMqadi.
Uthe lo msebenzi uzomudla uR4.5 million. Uthe njengoba indawo yakhe iheha izivakashi, ukubone kubalulekile ukuthi ayithuthukise ukuze ikwazi ukwamukela wonke umuntu ngaphandle kwenkinga ngisho nabakhubazekile.
“Sizama ukuthuthukisa ilokishi futhi ngigqugquzela nabanye osomabhizinisi ukuthi bakhe amabhizinisi abo elokishini. Ngokuwina umklomelo wokuba yindawo ephambili yokudla elokishini kukhombisa ukuthi kuyasebenzeka. Saqala kuwumkhukhu bheka manje kunjani.”
Unxuse abantu ukuthi bambekezelele. “Ngiyabonga kuhulumeni, uMasipala weTheku, umnyango oholwa uSihle Zikalala nabo bonke abeseka umbono. IGolden Arrows, Amazulu noShaun Mpisane neRoyal Eagles no-Irvin Khoza okunguyena engibukela kuye.”
Uthe uma sekuphelile wonke amagumbi azoba namagama awo. IVIP izobizwa ngeMzumbe kuthi phansi kube yiseZinqoleni. “Ngiqhamuka khona ogwini oluseNingizimu.”
“Ngiyabonga nomakhelwane ngokusebenzisana kahle ngoba le ndawo ngeyabo. Nangendlela esisebenza kahle ngayo noMjey (Zama umnikazi waseYadini) kuhle. Akuyona indlela abantu abacabanga ngayo. UMjey yisihlobo sami.”