Basenkingeni abajovayo bevimba ukukhulelwa
BABHEKENE nengwadla abesifazane abafuna ukusebenzisa umjovo njengendlela yokuvimbela ukukhulelwa kwazise ayitholakali ndawo emitholampilo kahulumeni, KwaZulu-Natal.
Iningi labesifazane abebedinga ukusebenzisa lo mjovo kuphoqeleke ukuthi babuyele emakhaya ngenxa yokungabikhona kwayo.
Isolezwe likhulume nabesifazane abajikiswe emitholampilo bethi bayojova njengenjwayelo kodwa batshelwa ukuthi abasebenzise ezinye izindlela zokuvikela inzalo.
Omunye walaba besifazane oneminyaka engu-27 waKwaMashu, ocele ukuthi ligodlwe igama lakhe ngoba esaba ukuhlukumezeka uma esebuyela emtholampilo uthe, uze waphoqeleka ukuthi asebenzise indlela yokuvimbela ukukhulelwa angayithandi.
Uthe usephindele kaningana emtholampilo obhekele ukuhlela oseCommercial City, eThekwini, ejikiswa ngenxa yokushoda komjovo.
“Sengize ngakhetha ukusebenzisa i-loop ngoba sengijikiswe kaningi kuthiwa awukho umjovo. Ngisebenzisa umjovo, ngidumele kakhulu ngalokhu okwenzekayo, sekumele ngisebenzise i-loop ekubeni inhloso yami kuwukusebenzisa umjovo,” kusho lona wesifazane.
Omunye obhekane nenkinga efanayo ngesikhathi eya emtholampilo kahulumeni oThongathi, uNksz Celiwe Mdletshe (24), uthe baze bacela komunye umtholampilo ozimele ukuthi ubalethele umjovo ngolunye usuku ngoba bethi abanawo.
Uphinde waveza ukuthi uye emtholampilo emasontweni amathathu edlule ehambise ingane wabe esecabanga ukuthi kungakuhle ajove kodwa watshelwa ukuthi awukho umjovo.
Uphinde wabuyela ngemuva kwezinsuku ezimbili nokuyilapho etshelwe ukuthi sewukhona ngenxa yosizo olutholakale emtholampilo ozimele.
Okhulumela uMnyango wezeMpilo KwaZulu-Natal, uNksz Ncumisa Mafunda, ukuqinisekisile ukuthi imijovo yokuvimbela ukukhulelwa ayikho ngokwanele emtholampilo kahulumeni.
“Abakhiqizi okuyibona abathumelela imitholampilo bakhale ngokushoda kwemijovo. Esingakusho ukuthi abantu bangasebenzisa ezinye izindlela zokuvikela njengamaphilisi, i-loop, amakhondomu, ukuzithiba nokunye,” kusho uNksz Mafunda.