Bayaphela abantu yizingozi kuLink Road
INGANE eshayiswe yimoto eShallcross ngeSonto ngumuntu wesithupha ukushayiswa yimoto kuLink Road.
Lezi zindaba zikhishwe yiShallcross Community Policing Forum izolo.
UPraise Mupisiri, oneminyaka emihlanu, ushayiswe yimoto ngesikhathi elandela unina obevakashe kwamalume wakhe ohlala emzini ongezansana kowakubo.
Ukushayiswa kukaPraise kuholele embhikishweni wabantu basemijondolo abagcine ngokuvala umgwaqo waseShallcross obizwa ngokuthi wuLink Road obusavaliwe ngisho izolo ngabo-10 ekuseni.
Amalungu omphakathi ashaye izimoto ashisa izikebhe zenkampani ezikhandayo.
Amalungu omphakathi afuna kufakwe izinciphisa- jubane kodwa amalungu eShallcross Community Policing Forum afuna abantu bafundiswe ngokuphepha emgwaqweni.
USihlalo weShallcross Community Policing Forum, uMnuz Mahendra Lallkan, uthe ukufundiswa kwabantu ngokuphepha emgwaqweni yikona okuzonciphisa izingozi nokufa kwabantu.
“Abantu basemijondolo yaseBottlebrush basusa izinsimbi ezivimba izingozi emgwaqweni ukuze bavule indawo yokupaka izimoto. Abantu abasakwazi ukuhamba ku-pavement sebephoqeleka ukuhamba emgwaqweni,” kusho uLallkan.
Uthe ezinyangeni eziyisithupha ezidlule bahlanu abantu abashayiswe yizimoto kuLink Road, abale kubo nenye intombazanyana.
UMnuz Joel Mupisiri, onguyise kaPraise, uthe yimbi kakhulu ingozi ebehlele bafuna kufakwe izinciphisa- jubane ukuze kungashoni abanye abantu.
Ngesikhathi ekhuluma umkakhe ubelokhu ekhala eduze kwakhe.
“Umkami ubeshiye indodakazi yethu emzini kamfowethu, ubenganakanga ukuthi iyamlandela. Uzwe sekunomsindo omkhulu wathi uma ephenduka wathola ukuthi indodakazi yethu ishayiswa yimoto,” kusho uMupisiri.
Uthe ababone ingozi bamtshele ukuthi i-robot beselishintsha ukuba-orange ngesikhathi indodakazi yakhe iwela kanti umshayeli ubezama ukuthi lingamvaleli washayisa ingane.
Uthe bamatasa namalungiselelo omngcwabo kwazise bazoyifihla eZimbabwe indodakazi yabo.
UMnuz Logan Moodley, wenkampani ekhanda izikebhe, uthe unomonakalo kaR200 000 njengoba kwebiwe izikebhe ezintathu zashiswa.
Inhloko yezokuxhumana kuMasipala weTheku, uNksz Tozi Mthethwa, uthe izinciphisa-jubane zizofakwa emgwaqweni uShallcross Road kusukela kuStardust Avenue kuya kuHigginson Highway kungakapheli uJuni.
UCaptain Nqobile Gwala, okhulumela amaphoyisa, uthe kuphenywa icala lokubulala ngokungenhloso nelokudala udlame emphakathini elivulelwe akade bebhikisha.