Kuhlomule nesifunda uMlaza kwezenze kahle kwa-matric
SIBUYE nezindondo ezintathu isifunda uMlaza kuklonyeliswa izifunda ezenze kahle kwa-matric nyakenye.
Lesi sifunda sibuye nendondo yokulala isibili ngokwenza kahle kwiMaths kwa-matric, kwiSayensi saphinde salala isibili ngokukhiqiza amaBachelor (okwenza ukuthi abafundi bangene emanyuvesi) ezifundeni ezingu-83 kuleli.
Kwenzeka lokhu nje akukapholi maseko kusule obenguMqondisi walesi sifunda uMnuz Bheki Ntuli ekhala ngokuhlukunyezwa yiSadtu ebifuna adedele izikhundla zothishanhloko, amaphini othishanhloko nezinhloko zeminyango.
UNgqongqoshe weMfundo eyisiSekelo, uNkk Angie Motshekga, uklomelise izifunda ezenze kahle eGoli ngempelasonto.
Okhulumela umnyango, uMnuz Elijah Mhlanga, uthe minyaka yonke baklomelisa izifunda ezenza kahle. Uthe abaqondisi bezifunda bawumgogodla wezemfundo ngoba yilapho kusuke kwenzeka khona umsebenzi.
IMenzi High, eseMlaza, okuyisikole osekuphele iminyaka sithola u-100% kwa-matric, sidle umhlanganiso ezikoleni ezingoQuintile 4 ngokwenza kahle kwamatric ukuzidlula zonke izikole zakuleli.
Izikole zakuleli zikleliswa ngokwama-Quintile, zisuka ku-1 okuyizikole ezisemakhaya nasemalokishini kuya ku-5 okuyizikole iningi lazo ezisuke zisemadolobheni.
UNtuli uthe kusho lukhulu ukuthi isifunda abesiphethe senze kahle kakhulu. Uthe ukulala isibili iminyaka ilandelana kwiMaths neSayensi kusho lukhulu ngoba yizifundo ezidingeka kakhulu.
“Ngingajabula uma abantu bengahlaziya kahle imiphumela ngoba akukhona nje kuphela ukuphuma unombolo 1 kodwa kuningi okusuke kukhona. UMlaza mkhulu ukudlula ezinye izifunda zihlanganisiwe ngakho kunomthelela. Ngizizwa ngithobekile ukuthi ngishiye umgqigqo omuhle kulesi sifunda ngokuthi noma besinabafundi abevile ku-20 000 abebefunda u-matric kodwa senze kahle kuzwelonke salala isibili uma uqhathanisa izifunda ezingu-83,” kusho uNtuli.
Ubongele neMenzi wathi noma engasekho kwezemfundo kodwa uyaziqhenya ngokuthi bakhetha uthishanhloko ofanele.
“Kuyangijabulisa ukuthi uthishanhloko okhona uyibambile uqhubeka lapho ashiya khona uMshololo (Felix owashona). Lokhu kusenza siziqhenye ngemiphumela yaseMenzi ngoba ithola u-100%. Ozakwethu abaqhubeke bayibambe ishisa uMlaza uqhubeke nokwenza kahle,” kusho uNtuli.
Uthishanhloko waseMenzi, uNksz Muntu Ntombela, ubonge othisha wathi basebenza kanzima ukuqinisekisa ukuthi kuphasa wonke umfundi.
“Ngimangele simenyezelwa njengabenze kahle ku-Quintile 4, sathola indondo nesitifiketi. Ngokwenza kahle kwesikole ngimenywe ukuthi ngiye e-England engqungqutheleni ethinta ukuphathwa kwezikole,” kusho yena.