‘Sizomkhumbula ngokuya emiphakathini’
UPHIKO lwabesifazane lwe-ANC KwaZulu-Natal luzokhumbula uNkk Winnie Madikizela-Mandela ngokuhambela imiphakathi ehlukene luzwa izinkinga zayo.
Lolu phiko luhlele uchungechunge lwemigubho yokuhlonipha isishoshovu esizobekwa endlini yaso yokugcina ngoMgqibelo, eFourways eGoli ngemuva kwenkonzo ezoba sezinkundleni zemidlalo i-Orlando.
USihlalo wophiko, uNkk Nonhlanhla Khoza, uthe uhlelo iMoloMakhelwane bazolugubha ngokumhlonipha.
“Sesinxuse osomabhizinisi ukuthi baxhase ukuze sisize umphakathi. Lapho sihluleka khona siyonxusa uhulumeni angenelele. Ubezibandakanya nabo bonke abantu, abasemijondolo nabadla izambane likapondo,” kusho uNkk Khoza.
Umgcinimafa kulolu phiko, uNkk Weziwe Thusi, uthe wabagqugquzela bebancane ukuthi bajoyine i-ANC babe amalungu ophiko.
Uthe njengoba ayengusonhlalakahle wayezinikele kubantu ebahlonipha.
“Ngisho engakwazi wayekubingelela afune ukwazi kabanzi ngawe. Babembiza ngawo wonke amagama ngoba bezama ukudicilela phansi isithunzi sakhe,” kusho uNkk Thusi. Mayelana nenkulumo yowayengumengameli, uMnuz Thabo Mbeki, lapho ayechaza khona ngokuchiliza uNkk Madikizela-Mandela kabuhlungu ezombingelela, uthe kwakuyilungelo lakhe ukuthi akhulume ngalesi sishoshovu.
UNkk Khoza uthe okwamanje ayisithupha amabhasi aya emngcwabeni.
“Kukhona azohamba omakadebona, uphiko lwabesifazane nazohamba intsha yesifazane ngoba zonke lezi zinhlaka zazisondele kuMam’ Winnie. Wayesitshela ukuthi kubaluleke kabi ukuthi sibe nabesifazane abasebancane,” kusho uNkk Khoza.
Imigubho iqale izolo ezifundeni ezehlukene njengaseMalahleni, Musa Dladla, uKhahlamba kanti namhlanje iseMoses Mabhida.
Umgubho wesifundazwe uzoba seSiyanda, KwaMashu ngoLwesine lapho kulindelwe khona uNkk Edna Molewa. Ngokwe-ANC kuzwelonke omunye umgubho uzoba seCity Hall ngoLwesine lapho kuzokhuluma iPhini likaMengameli we-ANC nelezwe uMnuz David Mabuza.