Siyakweseka okuphakanyiswe kufihlwa abengozi
UNGQONGQOSHE wezokuThutha KwaZuluNatal, uMnuz Mxolisi Kaunda, uyihlabe esikhonkosini uma ethi sekufanele kuboshwe abanikazi bamatekisi uma amatekisi abo ebandakanyeka ezingozini ezidalwa ukungabi sesimweni esifanele ukuba semgwaqweni.
UKaunda ubekhuluma emngcwabeni wabagibeli abangu-11 abashone engozini eyenzeke eNgome ngePhasika. Sebebonke abashona kule ngozi bangu14.
UKaunda uthe: “Iqiniso wukuthi umshayeli wetekisi usuke eqashiwe ukuba azosebenza. Uma esewutholile umsebenzi uyabuya nemali ayinikeze umnikazi wetekisi.
“Esikhundleni sokuthi usomatekisi alungise imoto ngale mali esetshenzwa wumshayeli, uvele amkhombe ngayo emgwaqweni ingenamabhuleki futhi inezimpandla zamathayi nokunye okungalungile. Ngakho umshayeli kusuke kungekho angakwenza ngoba usuke esebenzela umndeni wakhe.”
UKaunda uthe yingakho nje sebephakamisa ukuthi kuboshwe nomnikazi wemoto kungagcinwa ngomshayeli wayo.
Ngempela ukunika umshayeli ithikithi noma ukumbopha akusho lutho ngoba uyaqhubeka asebenze enalo ithikithi futhi nezinto asuke ejeziselwa zona emotweni zingalungile.
Uma eboshwa umshayeli, umnikazi wetekisi ulanda imoto yakhe, aqashe omunye umshayeli okufanele athi esebenza ebe ejeqeza amaphoyisa.
Abanikazi bamatekisi banendaba kakhulu nokuthi imoto ingakhishwa emgwaqweni kunokuphepha kwabagibeli. Kuwumqondo omuhle ukuthi kuboshwe nabo ngoba sekuze kwaphenduka ihlaya ukuthi ematekisini into ehluphayo ayilungiswa inqobo nje uma imoto isahamba.
Siyathemba ukuthi uKaunda ubengakhulumi ngoba nakhu ephambi kwemindeni eshonelwe kodwa akushilo uzokusukumela kuthathwe izinyathelo zokuthi isiphakamiso sigcine sesingumthetho. Lokhu kungasindisa inqwaba yabantu ngoba izigidi ngezigidi ezithembele ematekisini ngakho-ke kumqoka ukuthi kuphuculwe izinga lokuphepha kwabo.
Itekisi lingenisa imali zonke izinsuku ngakho ayikho into okumele yenze abanikazi bawo bahlulwe wukulungisa okonakele kuwona ngokushesha.