Nginexhala ngoBlack Coffee
MHLELI: Angizwakalise ixhala lami ngodaba lukaBlack Coffee lokuyodlala eTel Aviv (Israel). Ngithanda ukuqwashisa osomabhizinisi abangabaculi nosaziwayo ngokubaluleka kokwazi ukuthi limi kuphi izwe lethu ezinkingeni ezikhungethe umhlaba.
Ngo-Ephreli 4 ngangilalele umsakazo engiwuthandayo iGagasi FM ntambama. Kwakukhulunywa ngayo indaba kaBlack Coffee. Okungithusile nokumangazile yimizwa yabo ngalolu daba (wonke umuntu unelungelo lombono wakhe). Kimi kungicacele ukuthi nabo kabaqondi ukuthi kungani kube nomsindo ngokuya kukaBlack Coffee e-Israel. Bezwakale bonke beseka impendulo kaBlack Coffee ethi: “ngisebenzela isinkwa sabantwana bami”.
Into eyenza kungehli kahle kimi wukuthi e-Israel kuphethe uhulumeni wobandlululo futhi oqeda kuvulela ngenhlamvu kumaPalestina abemasha eGaza. Lapho kubulawe abantu abawu-17 kwalimala abangaphezu kuka1 400. U-DJ Black Coffee uye e-Israel kuqeda kwenzeka into efana ncamashi naseSharpeville ngesikhathi sobandlululo. Ukube emuva kweSharpeville kwafika uMichael Jackson ezonandisela amabhunu kwakuyoba njani? Sikhuluma nje amaKrestu angamaPalestina awakwazanga ukugubha iPhasika ezweni likaJesu ngoba amasosha abamuka amafulegi asePalestina.
Okubuhlungu wukuthi i-Israel yayixhasa uhulumeni wobandlululo ngezikhali nangokuqeqeshwa kwamasosha obandlululo kanti amaPalestina eseka ukukhululeka komuntu omnyama. Namuhla sesikusho kalula ukuthi “sibeka isinkwa etafuleni”. Sibeka isinkwa etafuleni ngokweseka abacindezeli bethu nabacindezeli babantu ababesixhasa? Ukuze kube nenkululeko ezweni lethu kwaba yimizamo yonswinyo lamazwe omhlaba. Ngiyacabanga nje ukuthi kwakuyoba njani ukube bonke laba bantu babecasha ngokuthi abayingeni eyaseNingizimu Afrika babeka isinkwa etafuleni ukuze kuphile imindeni yabo.
Izingqalabutho zomculo omama uMiriam Makeba nobaba uHugh Masekela zaziwaqonda amandla asemculweni. Ngenxa yabo umyalezo wobandlululo usankeneneza ezindlebeni zomhlaba. Kungakuhle ukuthi abaculi bethu abasimela emazweni bakhumbule ukuthi lithini izwe lakithi ezinkingeni zomhlaba. Asikwazi ukubeka isinkwa etafuleni lemindeni yethu ngokujabulisa izishoshovu zobandlululo nababulali babantu ngenxa yomhlaba wabo. Mfundisi NM Nkosi EPHANGWENI PARISH