Angikathintwa yiKaizer Chiefs neSuperSport United: Eymael
ULUC Eymael usephinde wavula isifuba ngamahlebezi amkhomba kwiKaizer Chiefs neSuperSport United.
U-Eymael opheka iFree State Stars uthathe izintambo ekuqaleni kwesizini wasayina inkontileka yeminyaka emibili.
Lo mqeqeshi odabuka eBelgium ukhonjwa kwiChiefs nakwiSuperSport United. Inkontileka kaSteve “Mphathi” Komphela iyaphela kwiChiefs ngoJuni kanti kwi-United kubambe uKaitano Tembo ngemuva kokushiya kuka-Eric Tinkler.
Abukeka emancane amathuba okuthi ivuselelwe inkontileka kaKomphela kwiChiefs osekuphele amasizini amabili enganqobi lutho.
U-Eymael utshele abezindaba ukuthi akakaze aluthole ucingo lweChiefs neSuperSport. “Abadlali ngibatshelile ukuthi angiphili ngamahebezi. Into engingenayo amandla ayo wukuvimba abantu ukuthi babhale abakuthandayo ngami. Mina angifihli-ke. Iqiniso ngilibeka njengoba linjalo. Ningabuza ngisho uRantsie (Mokoena oyisikhulu seqembu) uzonitshela. Amaqembu aphesheya nawalapha eNingizimu Afrika uma engithinta ngiyamazisa. Abanye baze bangibuze ukuthi ngabe uwedwa lapho ukhona ngivume kanti nginoRantsie. Ngibafaka kwiloudspeaker ukuze uRantsie ezwe. Niyabona-ke ukuthi ngineqiniso.
“Umqondo wami ulapha kwiFree State Stars. Nginenkontileka yeminyaka emibili. Iqembu elingifunayo kumele lingithenge. Ngiyaphinda ngiyasho futhi, angazi sengisho kangaki, angikaze ngithintwe yiSuperSport neChiefs,” kusho u-Eymael.
Ezakhe zizobhekana neChiefs kuma-semi final eNedbank Cup ngo-Ephreli 21 eMoses Mabhida Stadium, eThekwini. Uma benqoba bazotholana phezulu nozonqoba phakathi kweSundowns neMaritzburg United abazoshukana eHarry Gwala Stadium ngo-Ephreli 22. Owamanqamu useKapa ngoMeyi 19.
“Okwamanje akekho osangithintile. Yingakho ngithi okwamanje, ngoba kusangenzeka bangithinte. Angifuni-ke nithi nginamanga. Angiziboni njengomqeqeshi oseqophelweni eliphezulu. Kimina abaqeqeshi abaseqophelweni eliphezulu nguJose Mourihno (ocija iManchester United), Zinedine Zidane (weReal Madrid) no-Antonio Conte (weChelsea). Sengike ngawaqeqesha amaqembu amakhulu. Ngicije i-AS Vita Club eDRC Congo, ngapheka i-AlMerrikh yaseSudan neRayon Sports yaseRwanda. Ngeneme lapha kwiFree State Stars. Sizobona kuzokwenzekani. Uma kungekho ongithintayo ngizoqhubeka nomsebenzi wami,” kusho u-Eymael.
Ezika-Eymael zisethubeni elihle lokuzibekisela indawo kwiCaf Confederation Cup. Njengamanje zisendaweni yesihlanu kwi-log. Zihlukaniswe yiphuzu neMaritzburg esendaweni yesithathu.