Ubonga ukwesekwa ‘umlungu’ weMaritzburg
UYIZWA ngaphakathi eyokuteketiswa ngomlungu umgadli weMaritzburg United u-Andrea Fileccia ovutha engabaselwe phambi kwamapali kulezi zinsuku.
UFileccia odabuka eBelgium usehlohle amagoli ayisishiyagalombili kulo nyaka. Ngomzuliswano wokuqala wesizini ubelizwa ngendaba ijezi.
U-Evans Rusike ubemdlisela ogageni. Lo mgadli odabuka eZimbabwe ushiye iqembu wajoyina iSuperSport United.
“Iyangigqugquzela indlela abalandeli abangikhomoza ngayo uma ngisenkundleni. Ngiyayithanda indlela abangibiza ngayo uma bethi mlungu, mlungu. Ngiyazi ukuthi lokho kusho ukuthini. Yinto emnandi ngoba kuchaza ukuthi bayangithanda. Umndeni wami awukho lapha, isithandwa sami naso siseBelgium kanjalo nabangani bami ngakho bengidinga abantu abazongeseka baphinde bangifake ugqozi. Abalandeli beMaritzburg basivalile isikhala sabantu abasondelene nami. Kusho lukhulu kimina uma sebethi mlungu, mlungu. Kukhuphula ukuzethemba kwami,” kusho uFileccia.
Lesi sithandwa esisha sabalandeli beTeam of Choice sibanga ijezi noMohau Mokate phambili.
“Ukusebenza ngokuzikhandla enye into engenza ngibe sefomini. Sengishaye amagoli ayisishiyagalombili manje kuyo yonke imiqhudelwano selokhu kuqale umzuliswano wesibili ngoJanuwari. Ukusebenza kwami kanzima kuqale ngesikhathi senza amalungiselelo okuqala kwesizini ngonyaka odlule. Ngishaye amagoli ayisishiyagalolunye emidlalweni engu-10 yokulungiselela isizini. Ukubekezela nakho kungisizile. Bekungelula ukuhlala izinyanga ngingadlali. Kunzima ukushikisha ibhentshi. Ngenze isiqiniseko sokuthi ijezi ngilibamba ngezandla zombili ngoba bengingafuni ukulahlekelwa yindawo yami. Njengomgadli inhloso yakho wukudlala umdlalo nomdlalo, ushaye namagoli,” kusho uFileccia.
Ngempelasonto ushaye igoli ngesikhathi ezakhe zidlala ngokulingana ngo 1-1 neCape Town City eHarry Gwala Stadium, eMgungundlovu.
“Ngemuva kokuthola ithuba angibange ngisabheka emuva. Ngizimisele ngokuqhubeka nomgqigqo wami omuhle wokushaya amagoli emidlalweni ezayo,” kusho uFileccia.
ITeam of Choice izobhekana neMamelodi Sundowns kabili kule nyanga. Izodlala nayo kwi-semi final yeNedbank Cup nasemdlalweni we-Absa Premiership.
“ISundowns yilona iqembu elihamba phambili njengamanje eNingizimu Afrika. Kumele sizinikele ngokuphindiwe ukuze siyishaye koweligi nakwiNedbank Cup. Sineqembu eliqine ngokwanele ukubhekana neSundowns. Liqine kakhulu uma uliqhathanisa nezinye izikwati zalo eminyakeni eyedlule. Inhloso yethu wukufinyelela emdlalweni wamanqamu. Silwa ngayo yonke indlela ukuze sinqobe. Yibhola leli kwenzeka noma yini uma uzethemba,” kusho uFileccia.
Njengamanje iTeam of Choice ihlezi endaweni yesithathu kwi-log ngamaphuzu angu-39 emidlalweni engu-26. UFileccia ufuna babambelele endaweni yesithathu.
“Ukuqeda endaweni yesithathu kusezintweni esesibheke ukuzizuza. Ekuqaleni kwesizini besibheke ukuqeda kwi-Top 8 kodwa izinto sezijikile. Siyakhula umdlalo nomdlalo. Sifuna ukubambelela endaweni yesithathu. Sizolwela