Uyazithethelela kwasolwa ngako opheka iDowns
UYAZITHETHELELA ngokubashela isinyenyela abadlali bamanye amaqembu umqeqeshi weMamelodi Sundowns, uPitso Mosimane, osezakhele isigcwagcwa ezikhulwini ezahlukene ngalo mkhuba.
Eminyakeni edlule uMosimane ukhulume esidlangaleni ukuthi ufuna uSibusiso Vilakazi esagijima kwiBidvest Wits. Kwavela ukuthi uMosimane ukhuluma nalo mdlali ngasese.
Ukuphindile lokhu ngesizini edlule eshela u-Aubrey Ngoma esakwiCape Town City.
Lokhu kugcine kususe ukungezwani phakathi kwakhe nabaphathi bamaqembu abakholwa wukuthi kufanele akhulume neqembu kuqala ngaphambi kokukhuluma nomdlali. Izikhulu zeCity zimbhalele iheheba lencwadi zimgxeka nagcine eseyibiza “ngencwadi yothando”. Ngasekuqaleni konyaka uMosimane uthole uJeremy Brockie obekwiSuperSport United abengakufihli ukuthi uyamfuna. Laba badlali bagcine bephelele eChloorkop.
Sekuphele amasizini amabili kuthiwa uMosimane ufonela uBen Motshwari weWits oselizwa ngendaba ijezi kuGavin Hunt. Manje sekusabalele ukuthi ufuna injini yeMaritzburg United, uSiphesihle Ndlovu.
UMosimane uveze ukuthi nakuba ehlala egxekwa ngokweshela abadlali bamanye amaqembu kodwa nabanye abaqeqeshi bayakwenza lokhu. Uveze ukuthi kunomqeqeshi weqembu elikhulu asondelene naye ofonela uThemba Zwane zonke izinsuku. Ukuqinisekisile ukuthi akuyena uSteve Komphela weChiefs.
“Bathi ngibadlala umqondo, ngifuna ukuphazamisa abadlali babo. Uma ngithi ngiyamthenga abavumi ukungidayisela. Uyayikhumbula indaba kaJohn Comitis mayelana no-Aubrey Ngoma? Kodwa buza uZidane (umqeqeshi weReal Madrid) ukuthi uyamfuna yini umdlali othize. Uyakusho nje ukuthi ngiyamfuna lo mdlali futhi akubi nankinga. E-Europe wonke umuntu uyayisho leyo nto. Impendulo kuba wukuthi akayena umdlali wethu kodwa uma engatholakala singathanda ukuba naye eqenjini. Uyakusho lokho eNingizimu Afrika uthole “incwadi yothando” ,” kusho uMosimane.
“Ufuna ukungitshela ukuthi akekho oshela abadlali bami? Akekho okhuluma noMbekile (Asavela), Thabo Nthethe? Bayakhuluma kodwa kulungile. Kungani le nto siyenza into enkulu? Uma umuntu othize efonela umdlali wami kulungile. Asikhombise ukuvuthwa. Uma ngifuna u-Oupa Manyisa, sizomthola kanjani? Sikhuluma naye. Kuzokwenzekani uma sikhuluma neqembu siqede kodwa yena asibuze ukuthi ubani othe ngifuna ukudlalela iqembu lenu. Angifuni ukunidlalela. Uzothenga umuntu ongafuni ukudlalela iqembu lakho. Buza umdlali ukuthi singakuthenga?Kukhona abakhuluma nabadlali bami futhi kujwayelekile.”
NgeSonto iSundowns ivule igebe lamaphuzu amane esicongweni se-log ye-Absa Premiership ihlula iBaroka ngo 2-1. Ukuwina kwayo kufake ingcindezi kwi-Orlando Pirates esendaweni yesibili osekufanele nakanjani ibuye namaphuzu amathathu eMbombela Stadium, eMpumalanga, uma isibhekene neSuperSport United kusasa.
“Ingcindezi siyibuyisele kubona.Sebeshilo ukuthi iligi eyethu, uMusa Nyatama usho njalo. UMicho ukhulume kahle ngami kodwa ingcindezi ikuye manje. Abakwazi ukudlala ngokulingana, thina singakwenza lokho,” kusho uMosimane.