Sikhona isizungu sikaBonang emsakazweni
NGIBONE kulokhu kubikwa ukuthi lukhuza ibuya uhlelo lwethelevishini olukhuluma ngempilo yansuku zonke kasaziwayo uBonang Matheba.
Bese ngibuyelwe yithemba lokuthi kuzomenyezelwa nokuthi kukhona nomsakazo azowujoyina njengoba imisakazo engaphansi kweSABC yenza izinguquko nje.
UBonang washiya kwiMetro FM ngesikhathi sazo belu izinguquko ngonyaka odlule.
Izinguquko zenziwa, wethula uhlelo olulodwa wabe eseshiya. Kuthiwa okwamkhalisa wukuthi wayengatshelwanga ukuthi usezongena noLerato Kganyago okuyinto iSABC eyayichitha.
UDineo Ranaka, owangena esikhaleni sakhe wenza umsebenzi omuhle. Nasohlelweni lwakhe lwangempelasonto iMetro FM Top 40 Chart wenza into yamehlo uma elwethula ngoba kuvele kube sengathi yiphathi.
Kodwa sisekhona isizungu sikaBonang emsakazweni.
UBonang wayelwethula ngesineke uhlelo futhi ebazisa abalaleli bakhe nokungenye yezinto ezibalulekile emsakazweni, ukukwazi ukukhuluma nabalaleli bakho uma beshaya izingcingo.
Wayemuhle ngezeluleko esigabeni lapho kushaya khona abantu abanezinkinga kwezothando, i-Ask A Man.
Ngimkhumbula ekuphusheni abaculi benezingoma ezintsha.
Ngiyakhumbula nje ngesikhathi uNathi ekhiphe ingoma ethi Nomvula. Ngendlela uBonang ayeyidlala ngayo ohlelweni futhi eyincoma ngayo waze wethiwa igama kwathiwa unguNomvula.
Ubani ongakhohlwa ngesikhathi uMusa ekhipha ingoma ethi Mthande apike kuyo uRobbie Malinga, ongasekho? Ngisho sekuthiwa wawungayinakile ingoma kodwa indlela uBonang ayeyincoma ngayo wawuze uyinake igcine isishisa izikhotha.
Ngangike ngimuzwe futhi noma edlala abaculi abadala njengoBongi Dube bese kuthi ngemuva kwengoma ancome bese ecela ukuthi akhiphe umculo omusha.
Ngicabanga ukuthi ukumemezela izingoma ngemuva kokudlalwa emoyeni kungenye yezinto ezithokozelwa kakhulu ngabaculi. Ukudlala ingoma nje bese umsakazi engasho lutho kuhle ngoba kungena imali yama-royalties kodwa kuba kuhle kakhulu uma umsakazo ezomusho igama umculi negama le ngoma ukwenzela umlaleli okungenzeka ukuba uyithandile ingoma ukuze akwazi ukuyoyifuna.
Abanye abasakazi abahle ekumemezeni abaculi ngemuva kokudlala ingoma yabo nguSphectacula noDJ Naves kwiGagasi FM abaze bagqugquzele umlaleli ukuthi akayowuthenga umculo waloyo mculi abamdlalayo.
Sengathi imisakazo engakazenzi izinguquko ingasithola isikhala sikaBonang imbuyise emoyeni. Ungangibhalelela ku-fanelesibonge.bengu@inl.co.za noma kuTwitter @fanelebengu noma ku-Instagram @fanelebengu