Ithuluzi elizoveza uma usethubeni lokungenwa wufuba
KULINDELEKE ukuthi lenze umehluko omkhulu ekulashweni kofuba ithuluzi elihlolwa abacwaningi basemazweni ahlukene, okubalwa kubo abakuleli, elizoveza ngokushesha uma umuntu esethubeni lokungenwa wufuba ngokuhlola igazi.
Abacwaningi baseStellenbosch University bangamalungu ethimba elihlanganisa abacwaningi abavela emazweni ahlukene abasungule ithuluzi lokuhlola likhombise ukuthi umuntu anganofuba esikhathini esingangeminyaka emibili ngaphambi kokuthi aze abe nalo.
Ucwaningo lusanda kushicilelwa kwi-American Journal of Respiratory and Critical Care Medicine.
USolwazi Gerhard Walzl waseStellenbhosch University, omunye wabahola ucwaningo, uthe abantu abasondelene nabantu abanofuba basengozini enkulu yokugcina bebe nofuba. Uthe kunzima ukuthi unganika wonke umuntu imishanguzo yokuvikela ufuba.
“Ithimba lethu labacwaningi selisungule ithuluzi lokuhlola igazi elingasheshe liveze ukuthi obani kulabo abasuke besondelene nabantu abanofuba abangagcina bebenofuba. Labo sebenganikwa imishanguzo yokubavikela,” kusho uSolwazi Walzl.
Uthe ithuluzi elisheshe liveze ukuqala kofuba kulabo abangagcina benalo ngokusondelana nabantu abanofuba alikho. Ngokusho kwakhe ithuluzi elinjalo lingavimbela ukunikwa kwabantu imishanguzo yokuvikela ufuba ngokunganasidingo.
“Imishanguzo yokuvikela ufuba ithathwa amasonto amaningi futhi ingadala izinkinga. Sifuna ukwehlisa isibalo sabantu abaphoqeleka ukuthi bathathe le mishanguzo bese sinika labo abasengozini ngempela yokuthola ufuba,” kuchaza uSolwazi Walzl.
Ngokujwayelekile abantu abasondelene nabahlala nabantu abangenwe ufuba bayaye banikwe imishanguzo yokubavikela. Le mishanguzo ayinazo izinkinga ezifana nemishanguzo yokwelapha ufuba kodwa kuba nzima kwabanye abazi ukuthi abanalo ufuba ukuthi bayithathe ngendlela futhi baqhubeke nokuyithatha ikakhulu uma bona bengaziboni besengozini.
Ngaphandle kwabacwaningi baseStellenbosch University kukhona nabaseLondon School of Hygiene and Tropical Medicine (UK), iMedical Research Council Unit, eGambia, i-AERAS Global TB Vaccine Foundation, e-United States nabanye.
UWalzl uthe ucwaningo ekutheni kutholakale ithuluzi libe yisinyathelo sokuqala. Manje sekulindeleke ukuthi kuhlolwe ukusebenza nomthelela wethuluzi ekuvikeleni ufuba. Ukuhlolwa kokusebenza kwethuluzi kulindeleke ukuthi kwenziwe ezindaweni ezehlukene.