Umhlomulo ka-R1.5m kweZimnyama
I-ORLANDO Pirates eyenza ezibukwayo kulezi zinsuku kwi-Absa Premiership ihlomule ngo-R1.5 million. EZimnyama zihlabane ngalesi sizumbulu ngemuva kokuqeda endaweni yokuqala engxenyeni yesithathu yemidlalo yeligi. Imidlalo yeligi ihlukaniswe ngezigaba ezine ezaziwa nge-Q. Innovation.
Isigaba sokuqala sakhiwe yimidlalo eyisishiyaga-lombili esesibili sibe neyisikhombisa kuthi esesithathu sibe nohlu lwemidlalo eyisishiyagalombili. Esokugcina sinemidlalo eyisikhombisa.
Iqembu eliqeda liphezulu esigabeni ngasinye lihlabana ngo-R1.5 million. Selokhu luqalile lolu hlelo iPirates iyaqala ukuphuma phambili. Isigaba sokuqala samuka neBaroka FC kwathi esesibili saya kwiMamelodi Sundowns.
IPirates isefomini enhle kulo nyaka emidlalweni yeligi kwazise ayiyazi induku. Kulo nyaka eZimnyama zibhubhise iBaroka ngo 3-1 zabhuquzisa iMamelodi Sundowns ngo 3-1. IPirates iqhubekile nefomu enhle ibambana nePolokwane City ngo 1-1. Ngemuva kwalokho ishaye iPlatinum Stars ngo 2-0 yase ivithiza i-Ajax Cape Town ngo 3-0. Kowokugcina iguqise iMaritzburg United ngo 2-1. Ngonyaka odlule yabambana naMaZulu ngo 1-1 yashaywa yiFree State Stars ngo 2-1.
IPirates ihlomula ngoR1.5 million nje ngesonto eledlule bekubukwa yona emiklomelweni yePremier Soccer League (PSL) yokuklomelisa abadlali nomqeqeshi abashaye into ecokeme ngenyanga edlule.
UMilutin “Micho” Sredojevic uqokwe njengomqeqeshi ovelele kwathi uMusa Nyatama wathola umklomelo womdlali ovelele. Liqokwe njengelivelele igoli likaJustin Shonga alibasele enethini ezakhe zihlula iChippa United.
IBucs ihlezi endaweni yesibili kwi-log ngamaphuzu angu-45 emidlalweni engu25. Ihlukaniswe amaphuzu amane neMamelodi Sundowns eqhwakele kwilog ngamaphuzu angu-49 ngemuva kwemidlalo efanayo.
IPirates sekuphele amasizini amane manje ingawini lutho. Yagcina ukuphakamisa isicoco ngo2014 ihlabana ngeseNedbank Cup ishaya iBidvest Wits ngo 3-1 eMoses Mabhida Stadium, eThekwini.