URamaphosa uchazele abaseMbizana ngesinqumo sokungcwaba eGoli
UMENGAMELI wezwe uMnuz Cyril Ramaphosa utshele umndeni wesishoshovu samalungelo abantu, uNkk Winnie MadikizelaMandela eMbizana e-Eastern Cape, izolo ukuthi bebengafisa ukuthi angcwatshwe kule ndawo.
URamaphosa uthe kodwa ngenxa yokuthi amadodakazi akhe anqume ukuthi angcwatshwe eFourways, eGoli, wathi bazolandela lokho.
“Nathi besingafisa ukuthi uMama Winnie angcwatshwe eMbizana. Kodwa ngenxa yokunquma kwezingane zakhe sihambisana nezifiso zazo,” kusho uRamaphosa.
Ubekhuluma ngesikhathi ehlangene nalo mndeni eMbongweni okuyindawo akhulela kuyona uNkk Madikizela-Mandela njengoba kuke kwaba nezinkulumo zokuthi kukhona abebefisa ukuthi afihlwe kule ndawo njengoba kuthiwa ngisho kwayena esakhula wayesho ukuthi ufuna ukufihlwa eduze nabazali bakhe.
Inkonzo yomngcwabo wale ngqalabutho izoba sezinkundleni zemidlalo i-Orlando, eGoli ngoMgqibelo.
URamaphosa uqale kulo mndeni eyobhonga emswanini ngaphambi kokuba ayothula inkulumo enkonzweni yesikhumbuzo sesifundazwe ezinkundleni zemidlalo iMphuthumi Mafumbatha.
Ekhuluma kule nkonzo uthe uNkk Madikizela-Mandela wayibamba ishisa noma zimnetha wangalahla ithemba.
Uthe ngisho sekuboshwe owayengumyeni wakhe uMnuz Nelson Mandela, waqhubeka walwela inkululeko wangena ephuma ejele eboshwa.
Uqhube wathi uhambe nje ubejabule ngemigomo yengqungquthela ye-ANC ebiseNasrec eGoli yangoDisemba.
“Ubehambisana nemigomo esiyithathile engqungqutheleni ye-ANC. Abaholi abaphezulu be-ANC bamvakashelile ngemuva kwengqungquthela beyomazisa ngezinqumo ezithathiwe, wajabula kakhulu. Sanquma ukuthi sidle umhlaba ngaphandle kwesinxephezelo. Ngalokhu besitshengisa ukumhlonipha kwethu ngeqhaza lakhe emzabalazweni,” kusho uRamaphosa onguMengameli we-ANC.
Uthe ubelokhu elwela ukuthi inhlangano ibumbane.
“Sazibophezela ukuthi sizoyibumba i-ANC. Kumele simhloniphe ngokusebenza ngokuthembeka, sikhulume iqiniso siphinde siphumele obala sikhulume ngezinto uma zingahambi kahle,” kuqhuba uRamaphosa.
Uthe ubezinikele ezibophezele ekusebenzeleni abantu bakuleli.
“NganginoMama Winnie kubhaliselwa ukuvota. Wayezibophezele ekutheni uzoba yingxenye yokukhankasela ukhetho njengoba kuyiwa okhethweni. Wayesho njalo ethi thuma mina, wayehamba futhi.”
Inkonzo yesikhumbuzo ehlelwe ezingeni likazwelonke ise-Orlando Stadium namhlanje eSoweto.