Useyagadwa oshushisa elaseGlebe
USEYAGADWA umshushisi wecala labasolwa ngokuba ongqondongqondo ekubulaweni kwabantu ehostela laseMlaza, iGlebelands.
Lokhu kuvezwe umshushisi u-Advocate Dorian Paver, izolo eNkantolo yeMantshi eThekwini othe useyagadwa ngenxa yobucayi becala. UPaver kade etshela inkantolo izizathu zokuthi kungani kumele abasolwa benganikezwa ibheyili kanti uthe leli cala libucayi yingakho egcine esephoqelekile ukuba athole abazomgada imini nobusuku. “Kusukela ngoMgqibelo ngiyagadwa amahora angu-24 ngosuku.
Konke lokhu kungenxa yokuthi ngiwumshushisi kuleli cala.”
Uthe bayisithupha abantu abamqaphayo. Yize engazange aveze ukuthi uyasatshiswa kodwa Isolezwe lilunywe indlebe yimithombo yalo eveze ukuthi umshushisi akaphephile emuva kwezinsongo. UPaver noma eza ecaleni, ulandwa kwakhe aze abekwe phakathi enkantolo. Izolo beziqinile ezokuphepha njengoba bekunamaphoyisa angaphezulu kwamahlanu ehlome eyizingovolo ngesikhathi inkantolo iqhubeka.
U-Advocate Jimmy Howse we-Andile Dakela & Associates umele oMnuz Khayelihle Mbuthuma (28), Wonderboy Hlophe (45), Bhekukwazi Mdweshu (37) noNcomekile Ntsangase (34), uthe ukugadwa kukamshushisi akusho lutho ngebheyili ecelwa abasolwa. “Ukuthi umshushisi uyagadwa ngeke ngasho ukuthi kufanele noma cha kodwa abasolwa abahlangene nokugadwa kwakhe. Ngeke babekwa icala, baze banqatshelwe nebheyili ngoba umshushisi ezizwa engaphephile.”UHowse usihoxisile isicelo sebheyili sikaMbuthuma, ngoba usegwetshwe udilikajele kwelinye icala lowabulala ehostela laseMlaza.
Ummeli wabasolwa uthe kudlalwa ngabo laba ababoshiwe ngoba abanye amacala ababhekene nawo awabucayi njengoba kade kuvezwa phambilini. “Okunye okumele kubhekwe wukuthi ngokombiko wabaphenyi, kunamaqembu ahlukene alwayo ehostela ngakho ukugqunywa kwalaba basolwa kunezitha zabo ezikwamanye amaqembu ezijabulayo ngalokhu. Yizona lezo zitha ezibacindezelayo ukuba bagqunywe ejele noma kungafanele. Inkantolo ngicela idedele abasolwa, ngeke balibalekele icala.”
OMnuz Mbuyiselwa Mkhize (30), Vukani Mcobothi (30) noMondli Mthethwa (29) bamelwe ummeli wesihle uMnuz Peter Mhlongo.
UMhlongo izolo naye uhambe emazwini kaHowse wathi asikho isizathu esibambekayo esingenza ukuba abasolwa bagqunywe ejele. UMthethwa yena akasifakanga isicelo sebheyili.
Icala lihlehliselwe u-Ephreli 26.