Kuphazamiseke ukufunda kubhikishwa
KUPHAZAMISEKE ukufunda izolo esikoleni samabanga aphansi eNkobongo, eShakaskraal, ngesikhathi umphakathi ubhikisha ngaphandle kwesango lesikole ufuna kuxoshwe uthishanhloko.
Umphakathi uvuke umbhejazane ubhikisha esangweni laseDinuphozo Primary ufuna ukuthi kuqashwe uthishanhloko wasendaweni kwaphazamiseka usuku lokuvulwa kwezikole.
Kuthiwa amalungu omphakathi afike ekuseni abhikisha esangweni lesikole, avimba uthishanhloko, uNkk TP Zuma (elingatholakalanga igama lakhe).
Ngokusho komthombo weSolezwe ongathandanga ukudalulwa, akukho okubambekayo okwenza umphakathi ungamfuni uthishanhloko. Kuthiwa isimo besivele singesihle ngoba kade kwaqala ukungafunwa kukathishanhloko, okuthinteka kuzo izinhlaka ezahlukene zomphakathi okubalwa kuzo neSadtu.
Umthombo othembekile osesigungwini sokulawulwa kwesikole, uthe uthishanhloko uxoshwa ngenxa yokuthi akasiye owendawo futhi basebaningi othisha abangesibona abendawo abasazoxoshwa yize isigungu ingavumelani nalokhu.
Uthishanhloko unqabile ukuphawula wacela kuthintwe uMnyango wezeMfundo.
Okhulumela uMnyango wezeMfundo KwaZulu-Natal, uMnuz Kwazi Mthethwa, usigxekile isenzo somphakathi.
“Akuvumelekile ukuthi amalungu omphakathi nenyunyana ixoshe umuntu. Wumnyango oqasha othisha, yiwona futhi kuphela ovumelekile ukuxosha othisha,” kusho uMthethwa.
UNksz Nomarashiya Caluza, uNobhala weSadtu esifundazweni, uphikile ukuthi iSadtu iyathinteka odabeni lokuxosha uthishanhloko.
“Sifisa ukuthi umnyango ungenelele ngoba iSadtu ayikaze ixoshe thisha ngoba ayinalo ilungelo lokuxosha,” kusho uNksz Caluza.
Uthe uthishanhloko uyilungu leSadtu.