Izikole zithole izinto zokuthutha
KUQHILIKE izihlathi kubafundi basezikoleni ezingu-12 zaseNquthu izolo bethola izinto zokuthutha okungamabhasi namatekisi njengoba kwayalela inkantolo yaseMgungundlovu nyakenye.
Laba bafundi sebezohamba kalula nsuku zonke uma beya ezikoleni njengoba inhlangano i-Equal Education (EE) yaya enkantolo ifuna kuphoqwe uMnyango wezeMfundo esifundazweni ukuthi uhlinzeke ngezinto zokuthutha laba bafundi.
Abanye babafundi bakhala ngokuthi bahamba amabanga amade, basuka emakhaya kusemnyama babuye ebusuku. Abanye babo bathi baze baba yizisulu zokudlwengulwa ngenxa yokuhamba ezindaweni ezingaphephile.
Njengoba izolo izikole bezivulelwa ikota yesibili yonyaka, kube yinjabulo yodwa kulaba bafundi sebethola amabhasi.
UNgqongqoshe wezeMfundo KwaZulu-Natal uMnuz Mthandeni Dlungwane wazibophezela ekutheni uzowuhlonipha aphinde awulandele umyalelo weNkantolo eNkulu yaseMgungundlovu ngokuthi kumele uhlinzeke laba bafundi ngamabhasi.
Okhulumela i-Equal Education, uMnuz Luyolo Mazwembe, uthe bajabulile ukuthi umnyango ugcine uwulandele umyalelo wenkantolo wokuhlinzeka izikole ngamabhasi.
Uthe akuzona kuphela lezi zikole ezidinga amabhasi kodwa ziningi nezinye esifundazweni.
“Isinqumo senkantolo sangoNovemba nyakenye kwakungesona kuphela esalezi zikole ezingu-12. UDlungwane usethule umbiko ngezinhlelo zomnyango zokuhlinzeka ngezokuthutha abafundi,” kusho uMazwembe. Okhulumela uDlungwane, uMnuz Kwazi Mthethwa, uthe bangu-2 933 abafundi abazohlomula kulolu hlelo lokuhlinzekwa ngezokuthutha kule ndawo. Uveze ukuthi lo msebenzi uzokwenziwa osonkontileka abehlukene abanezinkontileka zokuhlinzeka ezokuthutha esifundazweni. “Umnyango uhlinzeke amabhasi ezikoleni ezingu-12 njengomyalelo wenkantolo,” kusho uMthethwa. Phambilini uDlungwane wathi umsebenzi wokuthuthwa kwabafundi ubusemnyangweni wezokuThutha esifundazweni okuyiwona owazi imizila.