INumsa igxeka iDA ngeholo likaR3 500
INYUNYANA yabasebenza ngokusansimbi, iNational Union of Metal Workers of South Africa (Numsa) igxeke iDA ngesiphakamiso sayo sokuthi intsha eqala ukusebenza ivunyelwe ukusayina izinkontileka ezingababophezeli abaqashi ukuthi bayiholele uR3 500 ngenyanga.
UMengameli weNumsa, uMnuz Andrew Chirwa uthe isiphakamiso seDA siyiveza obala ukuthi imele abaqashi futhi ayinandaba nabasebenzi.
“Asihambisani nomthetho kahulumeni obizwa ngeNational Minimum Wage othi abasebenzi mabahole uR20 ngehora ngoba abantu abakwazi ukuphila kahle ngoR3 500. Uma sekuthiwa mabayichithe iNational Minimum Wage kuyacaca ukuthi iDA ayinandaba nabantu abamnyama abaholelwa amakinati. I-DA yinhlangano yabaqashi engazimisele ukuphucula impilo yabasebenzi,” kusho uChirwa.
Uthe kunezikhulu zezinkampani ezihola oR69 000 ngosuku kodwa abasebenzi bezinkampani zabo beholelwa oR17 ngehora.
“Sizoqhubeka nokulwela abasebenzi ukuthi bathole iholo elingcono hhayi uR3 500. Sizolwela nokuthi uMnyango wezabaSebenzi uvikela amalungelo abantu hhayi awabaqashi. Siyacela abasebenzi bangazisayini izinkontileka ezibacindezelayo,” kusho uChirwa.
Uphinde wagxeka isiphakamiso sikahulumeni sokuvimbela abasebenzi ukuthi bateleke kodwa esingakasebenzi okwamanje.
“Ngo-Ephreli 25 sizoba nesiteleka esikhulu sokuvikela ilungelo lethu lokuteleka ngokuthi simashe ezweni jikelele. Simasha ngaphambi koSuku lweNkululeko ukukhombisa abantu ukuthi abasebenzi badinga inkululeko. Bavunyelwe ukuteleka uma benezinkinga. Imashi izoba seGauteng, Western Cape naKwaZulu-Natal. Sicela bonke abasebenzi beze emashini ngisho labo abangesiwo amalungu ethu,” kusho uChirwa.
UMnuz Sizwe Pamla obhekelele ezokuxhumana kwiCosatu, uthe iNumsa ibanga umsindo ngeNational Minimum Wage ngoba izofaka imali kubasebenzi. “Asifuni udaba lomthetho wamaholo lubukwe kabi ngoba luzophucula impilo yabasebenzi. Akufanele luhlaselwe, siyayizwa iNumsa ibanga umsindo. Sigqugquzela abasebenzi ukuthi bahlangane silwe nentela ekhokhwa uma uthenga izimpahla nokunye okucindezela abasebenzi,” kusho uPamla.
UMnuz Makashule Gana weDA uthe akusilo iqiniso ukuthi kuphasisiwe ukuthi abasebenzi bangazihlanganisi neNational Minimum Wage.
“Kwaba nesiphakamiso sokuthi abasebenzi abaqalayo ukusebenza bangayisayini iNational Minimum Wage kodwa sachithwa asikho kusomqulu wethu. Akusilo iqiniso ukuthi iDA yinhlangano yabaqashi ngoba iyinhlangano yawo wonke umuntu waseNingizimu Afrika,” kusho uGana.