Kukhuzwa izikhulu ze-ANC ezigxekanayo
OMAKADEBONA be-ANC bacele uNobhala Jikelele wale nhlangano uMnuz Ace Magashule nowayengungqongqoshe wezezimali, uMnuz Trevor Manuel, ukuthi baxazulule ukungaboni ngasolinye phakathi kwabo nokugxekana ngokusebenzisa izinhlaka ze-ANC.
Basho lokhu emuva kokuthi uManuel egxeke uMagashule ngokungawulungisi umuzi kamama wesizwe, uNkk Winnie Madikizela-Mandela oseBrandfort, eFree State kodwa ebe ekwazi ukuxhasa ipulazi lobisi okwadliwa kulo imali eyayizosiza abalimi abasafufusa.
UManuel uthe uMagashule usebatshela ukuthi uhlelo lokulungisa umuzi kaNkk Madikizela-Mandela seluthathe iminyaka engu-11 futhi imali yabuyiselwa emuva.
UMagashule uphoxe uManuel wathi ukhombisa ukuba wumdlwembe ozimisele ukudicilela i-ANC. Umsole ngokusebenzisa inkonzo yesikhumbuzo kaNkk MadikizelaMandela ukuhlasela abanye abaholi.
UMengameli womakadebona be-ANC, uMnuz Snuki Zikalala uthe ukugxekana kukaMagashule noManuel esidlangalaleni akusizi ngalutho ngoba kufanele uma kukhona abanganeme ngakho bakuphakamise ngaphakathi kwiANC.
“Sikholwa wukuthi izinto abaziphakamisayo zingaxazululwa yikomidi elibhekele ukusebenza kwe-ANC. Kufanele kulungiswe ukungaboni ngasolinye kungabonakali amaqabane elwa esidlangalaleni njengoba siya okhethweni,” kusho uZikalala.
UMnuz Tony Yengeni, oyilungu le-ANC elidala uthe i-ANC kufanele iqondise uManuel ubugwegwe ngokusebenzisa inkonzo yesikhumbuzo kaNkk MadikizelaMandela ukugxeka uNobhala Jikelele wenhlangano.
UMnuz William Bulwane onguNobhala Jikelele we-ANC eFree State, uthe kwakubekwe uR3 million wokuthi kulungiswe umuzi kaNkk MadikizelaMandela oseFree State, uR200 000 wasetshenziselwa ukuthi lo muzi ube yindawo yamagugu kwathi uR2.7 million wasetshenziselwa ukulungisa isonto laseWeseli okwasungulwa kulo i-ANC.
Kuleli sonto kwaba nomcimbi we-ANC wokugubha iminyaka engu-100 yasungulwa owawungo-2012.
Umhlaziyi wepolitiki uDkt Susan Booysen uthe sebeqalile osopolitiki ukuveza amahlazo.
“Ukuvela kokungaboni ngasolinye phakathi kwamalungu e-ANC kukhombisa ngokusobala ukuthi i-ANC inomsebenzi onzima wokuhlanganisa amalungu ayo,” kusho uDkt Booysen.