Asifuni ahambe uWalusz: Nzimande
UNOBHALA Jikelele weSACP, uDkt Blade Nzimande, ukugxekile ukuphucwa ubuzwe bukaJanus Walusz okuthiwa uma ephuma ejele uzokwazi ukubuyela kwelakubo ePoland.
“Asifuni ahambe uWalusz, sifuna afele ejele ngoba akafuni ukukhuluma iqiniso ngokubulawa komholi wethu,” kusho uNzimande.
UHani wadutshulwa ngaphandle komuzi wakhe eBoksburg ngo-1991 edutshulwa wuWalusz ngaphambi kokhetho lokuqala lukahulumeni wentando yabantu.
UNzimande uthe kuze kube manje akucaci ukuthi wayethunywe ngubani uWalusz futhi naye akazimisele ukukhuluma iqiniso yingakho bengafuni ukuthi abuyele kwelakubo.
Umcimbi wokukhumbula uHani ubuseThomas Nkobi Memorial Park, eBoksburg, Ekurhuleni.
IMeya kaMasipala waseKurhuleni, uMnuz Zwandile Masina, ithe njengoba kukhunjulwa uHani kusakhalelwa umama wesizwe, uNkk Winnie Madikizela-Mandela oshone ngoMsombuluko odlule.
Uchaze uHani noNkk MadikizelaMandela njengabaholi ababelwa nobandlululo bengabasabi abacindezeli, bengasabi nokuboshwa.
“Ukufa kukaMama Winnie kusilahlekisele ngomholi onomlando omkhulu, ubuchule, okhaliphile futhi ubekwazi ukuhlanganisa bonke abantu baseNingizimu Afrika. Sizomkhumbula njengoba sikhumbula uHani owayengasabi lutho egqugquzela abantu ukuthi balwe nengcindezelo,” kusho uNkk Madikizela-Mandela.
Umcimbi wokukhumbula uHani ubuhanjelwe wumndeni wakhe okubalwa uNkk Limpho Hani namadodakazi akhe, uNobhala Jikelele weCosatu uMnuz Bheki Ntshalintshali, iNhloko yezokhetho kwi-ANC nabanye abaholi.