IPhalamende selicele noKlebe bafune amalungu akwaGupta
AFUNWA uthuli amalungu omndeni wakwaGupta njengoba iPhalamende selicele usizo koKlebe nezinye izinhlaka zomthetho ukuze bazothula ubufakazi ekomidini eliphenya ngokulawulwa kombuso yidlanzana elifuna ukufeza izinhloso zalo.
IPhalamende lifuna kutholakale nendodana yobengumengameli wezwe uMnuz Jacob Zuma, uDuduzane Zuma.
Kulindeleke ukuthi ubufakazi bowayenguSihlalo weBhodi lakwaSouth African Airways (SAA), uNkk Dudu Myeni njengoba enikwe amasamanisi izolo ukuze azothula ubufakazi ekomidini.
USihlalo wekomidi eliphenya ngokulawulwa kombuso yidlanzana, uNkk Zukiswa Rantho uthe bafuna ukuxoxa noNkk Myeni, nabakwaGupta kumele bazothula ubufakazi.
IPhalamende licele usizo koKlebe emuva kokuthi usomabhizinisi wakuleli uMnuz Justin van Pletzen efake isithombe sakhe noMnuz Ajay Gupta athe umbone emasontweni amabili edlule, eDubai.
Ezinyangeni ezintathu ezedlule iPhalamende belidinga ubufakazi bomndeni wakwaGupta, obukaDuduzane nobukaNkk Myeni. UNkk Rantho uthe abameli basePhalamende bakuqinisekisile ukuthi uNkk Myeni uwatholile amasamanisi kodwa abakwazi ukuthola uDuduzane nezelamani zakwaGupta.
“Ngisalinde ukuzwa ukuthi sizothatha ziphi izinyathelo njengoba singazitholi izelamani zakwaGupta noDuduzane. Sicele usizo nakoKlebe nezinye izinhlaka zomthetho ukuthi basitholele bona ukuze sibanike amasamanisi azobaphoqa ukuthi beze ePhalamende,” kusho uNkk Rantho othe bebengakanqumi ukuthi uNkk Myeni uzoza nini ePhalamende, basazobonisana namanye amalungu ekomidi. Uthe bafuna ukusonga yonke into ngoJuni kodwa kuzocaca ukuthi abantu okufanele bethule ubufakazi bafika nini.