Imeya yaseZululand incoma uShenge
IMEYA yoMkhandlu waseZululand, uMfundisi Thulasizwe Buthelezi (osesithombeni) itusa uMengameli we-IFP inkosi Mangosuthu Buthelezi ngokuba ngumholi onombono ngokuphendula indawo yasoLundi ebiyihlathi ibe inkundla yabavakashi.
Ekhuluma esidlweni sasekuseni nosomabhizinisi oLundi ngoMsombuluko, uButhelezi uthe ngeminyaka yama-70s indawo yasoLundi yayiyihlathi elimnyama engekho owayecabanga ukuthi ingathuthuka kuphume nedolobha kuyona. “Kumele simbonge uMntwana waKwaPhindangene ngombono wakhe, wakwazi ukubona igolide ehlathini.”Uthe nabo bewubuholi obusha boMkhandlu waseZululand bazimisele ngokuqhubeka bayithuthukise indawo yaseZululand. Uthe uzimisele ngokukhuculula konke ukungcola akufice emkhandlwini ukuze akwazi ukwenza kahle umsebenzi.
“Ngizokhuculula ngomshanelo welala ngenze isiqiniseko sokuthi awekho amabibi,” kusho uButhelezi.
Uveze ukuthi banesifiso sokuthi indawo yaseMakhosini, oLundi ihlonzwe njengenye yezindawo zamagugu emhlabeni.
“Sizobhalela inhlangano yezizwe i-United Nations siyicele ukuba ihlonze indawo yaseMakhosini njengeyamagugu emhlabeni, eMakhosini yilapho kulele khona inqwaba yamakhosi aseNdlunkulu kaZulu,” kusho uButhelezi.
Uthe uma isifiso sabo siphumelela lokho kuzosho ukuthi indawo yaseMakhosini izoba ngeyesithathu ukuba ibekwe kulesi sigaba ngemuva kweSimangaliso neDrakensburg.
Uthe uMkhosi woMhlanga ngomunye wemigubho edonsa kakhulu izivakashi nezasemazweni omhlaba kodwa abantu baseZululand akukho abakwenzayo ukuzihlela ukuze bazuze ngomnotho ongena uma kukhona lo mkhosi.
“Indawo yaseZululand inomlando ojulile futhi iyakhaya lamagugu kuyadinga ukuthi ithuthukiswe ukuze ibe ngezinye zezindawo ezihanjelwa kakhulu izivakashi emhlabeni,” kusho uButhelezi.
Uthe kuyabathokozisa futhi ukuthi ngisho Isilo samaBandla, uGoodwill Zwelithini sinezigodlo esifundeni sabo.