Kuzofezeka isifiso kwakhiwa isibhedlela
indawo yangakubo. Uthe uyabona ukuthi abantu balapha bayasidinga isibhedlela. Ubekhuluma emhlanganweni namakhosi obuseMbumbulu ngoMsombuluko.
“Ukuthola umyalelo ovela emakhosini ukuthi ngiqhamuke nombiko ngalolu daba yinto engiyithathela phezulu. Noma kunezingqinamba ngibone kubalulekile ukuthi ngize ngizowuletha umbiko oshoyo ukuthi sikuphi nezinhlelo zokwenza lokhu (ukwakha isibhedlela). Isibhedlela siyadingeka ngoba kukude kubantu abasuke beqhamuka eMfume, eLovu beya ePrince Mshiyeni bese befika kunolayini abade ngenxa yomthamo omkhulu weziguli. Kumqoka ukuthi siyibheke eyokwakhiwa kwesibhedlela eMbumbulu,” kusho uDhlomo.
Uthe ukubeke kwacaca emakhosini ukuthi udaba lokwakhiwa kwesibhedlela kule ndawo selusezithebeni.
“Manje kumele ngibuyele emuva ngibheke isimo sethu sezimali ukuze sibone ukuthi kuhamba kanjani ezimalini ngizwe nakuNdunankulu ngodaba lwaso. Kuyisifiso sethu ukuthi kube nezinhlelo ezicacile esizivezayo mayelana nokwakhiwa kwalesi sibhedlela esisha,” kusho uDhlomo.
Uxwayise ngokuthi ukwakhiwa kwesibhedlela ngeke kube yinto engathatha usuku.
Ngesikhathi ethula inkulumo yakhe emalungwini ekomiti lezempilo ezindlini zeSishayamthetho ngo-2015, uDhlomo wakuveza ukuthi bafisa ukwakha isibhedlela eMbumbulu nokuyisiphakamiso esathakaselwa yikomiti.
Wakhala ngokuthi isibhedlela iPrince Mshiyeni Memorial samukela iziguli ezilinganiselwa ku-39 000 ngenyanga nokuthi sihlinzeka usizo lwezempilo kubantu abavela ezindaweni eziningi kakhulu. Lokhu kugcina kunomthelela ekutheni kube nezikhalo kwabanye ngosizo abalutholayo kulesi sibhedlela.
Waveza ukuthi bafisa ukwakha isibhedlela esisha emuva kokuthi sekuphothulwe ukwakhiwa kwesibhedlela Dr Pixley Ka-Isaka Seme Memorial, ezosiza abantu abakhele eNtuzuma, KwaMashu naseNanda. Lesi sibhedlela kulindeleke ukuthi sivulwe phakathi nonyaka ozayo.